兒童智能手錶本為方便家長隨時聯絡子女，但喺浙江海鹽，一位7歲女童嘅手錶卻被人滲透，成為可疑人士接觸學童嘅窗口。
郭先生嘅女兒今年7歲，喺海鹽就讀小學。今年10月下旬，女童手上嘅兒童手錶收到一個陌生帳户嘅「好友」邀請。對話紀錄顯示，對方起初冇表露惡意，以「你幾年級」、「交個朋友」呢類閒聊口吻試探，其後追問性別，再發送含性暗示、意識不良嘅圖片，企圖拉近距離。
郭先生事後追查發現，呢個「好友」並非隨機新增，而係由另一名學童嘅手錶「分享」連結而來。換言之，只要學童之間互相轉發，陌生人便能夠繞過家長審核，直接潛入兒童嘅通訊錄。
事件中段，對方更接連發送3段文字：「你面前有一個詭異的男子站著」、「正在死死地盯著你」、「貪婪的目光看着你垂涎三尺」，訊息中亦夾雜疑似意識不良嘅表情包。郭先生察覺事態嚴重，隨即向海鹽縣公安局武原派出所報警，案件現正調查中。
為追查對方身份，郭先生同警員合共18次致電該陌生號碼，惟只接通咗一次，接通時間係平日朝8至9時，電話隨即被掛斷，而該時段正值學童上課。郭先生擔憂呢名陌生人未必只針對一個學童，建議家長定期檢查子女嘅智能設備，留意「加好友」及「分享」功能可能存在嘅安全缺口。
姣姐講多句：呢單事件唔好玩，但的確反映現實——呢類「方便」嘅社交功能，對一個冇判斷能力嘅7歲細路仔嚟講，就係一道冇閂嘅門。家長除咗定期查手機同手錶嘅通訊錄、好友名單，平台一層嘅未成年人保護機制亦需要跟上。細路嘅安全唔可以全賴家長一對一盯，系統設計本身就有責任。
黃姣姐整合｜頂硬上
