「財富自由、提早退休」好多人嘅夢，但想靠收租「躺平退休」，未必咁易。來自吉林嘅30歲男范俊傑，2023年喺湖南長沙分批購入14個高齡舊樓「老破小」單位，總投入逾200萬人民幣（約235萬港元），賬面年租金理論上可達21.3萬人民幣（約25萬港元），即係「不足10年回本」，睇落好似穩賺。
但帳面數同落袋數，係兩回事。14個單位實際租出嘅只冇11個，每年租金約18萬人民幣（約21.1萬港元）。一個54平方米單位曾連續空置3個月，帳面本有約2萬人民幣年租，結果損咗約6,000元人民幣。舊樓水喉、熱水爐、渠管頻頻出問題，每個單位每年維修同家電折舊要2,000至3,000人民幣，再加管理費、租賃税，每次換租客仲要畀半個月租金做代理佣金。
淨結果：14個單位每年持有成本高達6.9萬至8萬人民幣，扣晒之後淨利只剩約10萬至11.1萬人民幣，實際年化回報約4.5%至5.5%，比帳面縮水近三成。
佢近日喺微博澄清：「雖然我趕上了收租紅利，但入局的最佳時機已經過了，現在需要謹慎。」佢話樓嘢係實物但租務瑣事纏身、流動性差，反不如紅利資產或指數基金省心、派息穩定；又強調「我發原視頻，不是鼓勵大家跟風入場」。
背景係長沙已籌集11.5萬個保障性租賃住房同3.4萬個人才公寓，部分單連管理費月租只須1,250至1,500人民幣，啱周邊私樓4至5折；帶裝修、有託管嘅公營房屋入場，舊樓價優正逐漸消失，收租好賺好難。
姣姐講多句： 呢單最有趣係「帳面躺平」同「實測打工」嘅巨大落差——帳面年入21萬，扣晒成本只落袋10幾萬，仲要日日接租客電話修理水喉，這下「躺平退休」變「起飛打工」。想跟風收租嗰位，睇清楚租金帳同實際落袋帳之間，仲隔住幾萬塊維修費。
