一名女網友近日喺 Dcard 以「每天壓線打卡被經理針對」為題發文，指自己公司規定早上9點返工，佢日常8點58分、59分已經到崗，從未遲到，工作都如期完成，忙碌時仲配合加班。但近期經理開始對佢有意見，喺會議上暗指部分年輕人「踩住時間入公司」，缺乏工作熱忱同向心力，私下仲揾佢談話，話佢「只會覺得自己係為咗領薪水先至嚟返工」。
最犀利嘅係上週某日，佢照例8點59分打卡進辦公室，經理竟當面質問：「你每天都這麼晚到，是否真的把公司放在心上？」偏偏另一位同事9點10分先至返到公司，即遲到10分鐘，經理不但冇計，仲笑住問佢「前日應酬太累」。
事後事主得知，呢位同事平時陪主管吃飯、打球，偶爾幫手處理私人事務。仲有一份報告，事主落班前就完成，反被批「只係將事做完、缺乏主動思考」；另一位同事拖到隔日先交件，反被讚有想法，仲被話值得畀更多機會。
資料圖片：Pixabay
事主直言自己完全唔明白，所謂「向心力」原來唔係睇工作表現，係睇同主管嘅交情。佢已經開始瀏覽其他工作機會。
貼文流出後網民反應唔少。有人幫佢抱不平：「領多少錢、做多少事，壓線又冇遲到有什麼問題」，仲有話「會在意打卡嘅人，代表冇其他嘢能顯示佢嘅地位」。亦有「過來人」直言：「我以前都係文中嗰種人，會特別經營關係，後來就對職場失望了，但這很現實啊。」
姣姐講多句：呢啲職場雙標故事，寫喺邊都係同樣荒謬。有「能力」嘅老細真係會站喺打卡鐘前計時？真正問題係：你幾時先至肯用同一個標準睇自己——唔單止問「佢點解咁針對我」，仲要問「我仲有冇必要喺呢度等佢醒」。
黃姣姐整合｜頂硬上
