K-pop 粉絲包咖啡店搞「生日應援」（生咖）嘅玩法，派杯套、派小卡、設打卡位，大家都見過；但將成套偶像應援規格搬到耶穌身上，又係另一回事。呢個由韓國校園基督徒團契（CCC）發起嘅「耶穌生日應援」，近年喺韓國年輕人之間越玩越大型，今年更首次出擊到香港。
喺韓國嘅「耶穌生咖」，店會照足韓星生咖規格擺放耶穌立牌，立牌特別擺出「單手比半心」手勢，方便打卡嘅人合照湊成完整愛心。顧客點杯飲品就能換特製杯套、貼紙同印住耶穌肖像嘅「偶像小卡」；現場有時仲有應援手燈、主題韓式拍貼機（人生四格）同集章小任務，完成指定互動可免費換領意式雪糕等小禮物。無論係唔係信徒，都不少年輕人願意嚟打卡同樂。
香港站將生日概念同文創市集相結合，集合一眾本地原創品牌，以「為耶穌慶生」為主題打造特色打卡位同原創周邊，與韓國三城遙相呼應。地點喺荔枝角 D2 Place TWO 地下 The Garage，12月24日至27日開放：平安夜 12:00–21:00；聖誕節同 Boxing Day（25–26日）10:00–21:00；27日 10:00–20:00。韓國同步活動則喺首爾（18–25/12）、釜山（19–25/12）同全州（20–24/12）展開。
網民對呢個跨城「耶穌慶生巡演」反應好熱烈，大讚係「真正的頂流」，有人指係「名正言順嘅偶像化左耶穌」，仲有人笑問「我偶像復活過你偶像復活過未？」「有冇耶穌飛天寵粉環節」。
姣姐講多句： 韓國將偶像文化用到宗教人物身上，玩法的確係神；但「耶穌」呢個名字本身就係宗教象徵，點樣度衡宗教形象同網絡噱頭之間嘅界線，都係值得留意嘅地方。活動本質係節日文創打卡，唔涉及任何宗教儀式，大家睇齊樂過聖誕就得。
