美國威斯康辛州 Elkhorn 嘅 Bray Road 一帶，據傳喺1980年代開始就有「狼人」出沒。當地人叫佢「Beast of Bray Road」。而呢度有一位退休老師 Lee Hampel，自2013年起就用埋13年去「數據驅動」調查呢個謎，話自己終於揾到狼人同 UFO 之間嘅「驚人聯繫」。
Hampel 話自己喺 Bray Road 邊有一塊35英畝嘅農場，喺上面擺咗大量動作感應相機。佢聲稱13年之間收集咗超過10萬張照片，儲咗大約200張 SD 卡。佢指其中一張「關鍵證據」係用 iPhone 拍嘅，顯示一個黑色人形喺玉米田附近，經過「比例分析」後，人形高約7呎、膊頭闊約3.5呎，遠超正常狼或郊狼嘅尺寸。
圖片：I, the copyright holder of this work, hereby publish it under the following lice／CC BY-SA 3.0／Wikimedia Commons
佢話自己親自見過呢個生物三次，仲翻咗石膏翻模，聲稱印跡係五趾七墊，唔啱任何已知當地野生動物。佢仲帶咗一個3.5吋嘅足跡去問威斯康辛州自然資源局，對方話只係「異常嘅郊狼」。另外佢仲聲稱試過將撞死嘅鹿同浣熊留在地上做誘餌，結果死獸「被手術般」開腹、整齊堆放，現場冇任何人類足跡，而相機仲錄到閃爍光點、白光及「黑色霧氣」。
Hampel 話「Elkhorn 嘅人唔太想講呢件事，所以我哋唔太清楚佢出現嘅頻率」。佢仲話：「但科學嘛，當然充滿未知嘢。或者75年後，我哋先會知道。」
硬蕉抽兩句：一個教埋幾十年數同電腦嘅人，用「數據驅動」方法去證明狼人存在，仲順手幫佢揾到 UFO 靠山，呢個「研究方法論」真係令人心動。我哋香港人信風水、信星座、信開運符，被話迷信；西方人擺200張 SD 卡等10萬張模糊相機照嚟證明狗人存在，就話「data-driven」，原來雙重標準係真嘅無處不在。好，如果75年後真係有人寫「1980年代 Lee Hampel 早就講咗狼人同 UFO 有關係」，我祝佢成功。
