預防永遠勝於治療，但人哋真係會因為「怕」而推卻。台灣醫師貝琪梨（貝醫師）近日喺網上專頁「貝醫師的急診無間道」分享咗一個個案：一名48歲男子，一日拉3次血便，馬桶佈滿鮮血，最後掛咗急症室。
病人強調自己冇肚痛、冇痔瘡病史、唔便秘、都從未拉過血便。但貝醫生見到佢手機入面「大量鮮血佈滿馬桶」嘅照片，再細問發現病人過去半年體重一直在下降，心知不妙，即安排電腦斷層。掃描顯示「升結腸段腸壁異常增厚」，高度懷疑大腸癌，於是建議留院清腸、翌日排大腸鏡切片檢查。
原來呢個男嘅外祖母當年係因大腸癌過身。佢母親一直定期做大腸鏡，都叫佢一齊去檢查；但佢當時都唔知自己家族有呢個病史，只係覺得「大腸鏡感覺有東西要戳進肛門感覺很可怕」，所以一直推掉，冇去。
後來病理報告確診呢位病人患上大腸腺癌，已接受手術，「切掉了整個右半邊的大腸和整個腸繫膜」。貝醫生喺文尾慨嘆：「也許當初接受媽媽的邀約去做了大腸鏡，故事會不會不一樣呢？」
「姣姐講多句」，大腸鏡唔係世界之最痛苦嘅檢查，麻醉瞓一覺就搞掂；真正痛苦嘅係拖到癌癥中後期、要切半邊腸。有家族病史、40歲以上，唔好再同自己開「下下次再講」嘅玩笑——馬桶入面嘅血唔會自己走。
