近日美、英、日、歐幾乎齊齊跳出來教人儲糧。英國政府10月22日啟動「做好準備」（Be Ready）宣傳，叫家庭為可能持續3日的斷電、斷水、斷訊做好準備；美國FBI前副局長邦吉諾（Dan Bongino）26日喺節目上呼籲儲備至少3日食物物資；日本災害管理副大臣細野豪志同日落聲，政府將發布「緊急要請」，要國民即日起儲至少3日、有餘力可達1週嘅糧水同應急物資，「防災廳」亦會喺11月2日正式成立。歐盟早喺2025年已訂下72小時自給自足目標，德國甚至建議儲足10日。
消息一出，網民即刻熱議，有人話「第三次世界大戰係咪要嚟喇」。不過有外媒10月28日指出，好多國家其實數年前甚至多年嚟都早已發出類似指引，唔係新事。
咁如果香港人真係想學返兩手，街市老手就有一套「港式儲糧術」，同官方建議嘅3日完全唔係數量級。
生果檔檔主話，水果基本上放唔到1個月，橙最多一兩星期，生果界最擺得嘅其實係柚，原個放1個月冇問題；厚皮瓜以為耐放，菜檔東主直話「1個月瓜都乾埋」，最多1星期。菇類大部分一兩星期，真姬菇一類可放雪櫃1個月，但要看到港時新鮮唔新鮮。
資料圖片：Pixabay
魚肉方面，海魚要吃新鮮，不推薦當存糧；淡水鯇魚平價耐放，入冰箱冷藏「絕對可放1個月」，買返唔洗沖，膠袋密封就得。急凍起骨魚塊、雞翼雞扒都係好選擇，10蚊左右就有交易。凍肉放幾個月冇問題，但要保鮮袋分開裝、一包一次解凍，否則容易變壞。
主糧同罐頭放得最耐，「選購時應該先擔心會否吃到悶」。雞蛋誤以為放雪櫃可以放很久，但包裝有食用期限。以往港人搶糧，多數搶嘅係米。
姣姐講多句：外國人叫3日，我哋街市老手教1個月，高下立判。不過存糧係存糧，米飯係米飯，大家自己心中有數就得，唔使照單全收，更唔使照抄嗰啲「第三次世界大戰」驚嚇標題。
黃姣姐整合｜頂硬上
