澳洲78歲婦人Frances Paroissien賣樓花約20萬澳元（約110萬港元），租低美國郵輪「奧德賽號」（MV Odyssey）一個艙房15年，長住海上。呢個「長租船屋」嘅大決定，今週正式破產。
本週，「奧德賽號」營運商Villa Vie Residences突然宣佈停航，郵輪喺柬埔寨西哈努克（西港）靠岸，旅客被迫落船，當時船上有203名乘客及156名船員。公司喺10月27日嘅聲明中解釋，自2月底伊朗衝突爆發後燃油成本急升，公司已放慢航速、增加港口停留時間，但仍未能抵銷開支，正尋求資本重組及新融資，「任何結果都無法保證」。
就喺呢班船上，Paroissien係約5名澳洲籍長住旅客其中一名。佢同公司簽下嘅係15年艙房租約，郵輪2024年10月出發，計劃展開約3年半嘅環球航行，途中探索約147個國家。宣傳資料寫住：「乘客只需一次性整理行李，就可以花數年時間探索約147個國家。」話好聽，但承諾今週失效。
資料圖片：Pixabay
「我冇屋住，喺澳洲嘅生意都收咗尾，因為我為咗喺呢艘船買房，將所有嘢都賣晒。」Paroissien指，佢為遷就郵輪生活，放棄咗喺澳洲嘅住所及生意，租約已生效兩年，人先被「收樓」。
Paroissien而家喺泰國租下一間公寓，租期六個月，表示會等住看「奧德賽號」有冇可能復航，再決定去留。佢同時質疑公司燃油成本解釋，直言「佢哋根本唔係做生意」。公司早先亦曾呼籲當地居民捐款，協助維持郵輪運作——一艘賣「長住」嘅郵輪，要靠乘客捐錢續命，呢個「發展商」嘅體質，從頭到尾就有嘢唔啱。
硬蕉抽兩句： 講到「業主收樓」，香港人最熟呢個戲碼。住宅嘅業主可以收樓，郵輪嘅營運商都可以收船，但佢哋收走嘅，係一個78歲老婦人嘅全部家當。20萬澳元，15年租約，換返一句「任何結果都無法保證」——呢個唔係「長住」，呢個係「被逐」。
硬蕉哥整合｜頂硬上
