大分縣鐵輪温泉街入面，有棟屋牆身破咗個大洞，入面唔似普通房間，反而好似岩洞一樣，最近喺日本網上引起熱烈討論。網民搞唔明點解有棟屋破成咁，以為係咩意外或者天災。
原來呢個係當地政府近年邀請各國藝術家打造嘅裝置藝術作品之一，由荒神明香、南川憲二、增井宏文三人組成嘅日本現代藝術團隊「[mé]」創作，作品名叫做「space II」。藝術團隊嘅講法係，想用整棟屋鑿出一個洞穴，營造「喺世界上開嘅一個窟窿」，帶觀眾擺脱知識與意義嘅束縛，創造嶄新視角。
呢次討論嘅導火線，係日本插畫家、漫畫家及同人創作者倉澤京章喺 X 上面貼出呢棟「破咗大洞嘅房子」，隨即引發網民議論，好多人都認唔出呢個係藝術品。細睇屋入面又唔似普通房間，反而好似岩洞，更加搞到大家一頭霧水。
呢件裝置就設喺温泉街入面，所有遊客都可以喺路上直接睇到。不過如果想入屋探探個洞穴，就淨係可以申請參加特定時間舉辦嘅導覽活動。
姣姐講多句，講真呢件藝術品好成功——因為真係有大批人認唔出呢個係藝術。佢哋「擺脱知識與意義束縛」嘅創作理念，成功令觀眾只見到一棟破屋，完全冇「啊呢個係藝術品」嘅反應。如果藝術嘅目的係讓人重新審視習慣，呢個大概係最高級嘅實現——你連佢係藝術都睇唔出。
黃姣姐整合｜頂硬上
