土耳其有一處叫「杜魯皮納爾地層（Durupınar Formation）」嘅船型地貌，向來被主流地質學家同考古學家視為自然侵蝕而成，唔係乜石化船隻。呢度突然傳出「重大進展」：有私人團隊話用雷達掃描，喺地層入面揾到「3層人造結構」。
一個名為「挪亞方舟掃描（Noah's Ark Scans）」嘅私人團隊指，雷達顯示地層深處有「空洞」、「走廊」同燃燒過嘅木頭碎片，而且呢啲結構「與地質構造無關」、絕非自然形成。研究團隊聲稱，呢啲木頭碎片「很可能」就係諾亞方舟經過炭化嘅殘骸。
最對號入座嘅位，係團隊聲稱掃描辨識出一層密集地下結構，可分三個獨立層帶，同《聖經》入面諾亞方舟「三層甲板」嘅記載「相呼應」。研究又引述美國資深國防科學家巴赫塔博士（Dr Khosrow Bakhtar）監督嘅雷達結果，話土丘內部确有類似房間同走廊嘅構造，而且同地質無關。
不過同一份報道亦寫埋反證：創辦人瓊斯（Andrew Jones）自己就直言，木頭「不排除係牧羊人生火後嘅餘燼」。而主流地質學家同考古學家睇法冇變，指呢處地層係自然侵蝕形成；加上該地區已有數千年居住歷史，木頭可能來自古代聚落、前哨據點，或由山崩帶來；相關樣本嘅實驗室檢測「仍有待進行」，因此「發現諾亞方舟」呢個説法，目前仍未獲證實。
硬蕉抽兩句：呢套操作嘅荒誕，唔係喺「揾到方舟」，而係喺「用雷達認證聖經」嗰個邏輯。三層結構對上聖經三層甲板，咁啱就話「相呼應」，係將結論預設咗先篩證據，成個方向反晒。真正嘅科學係證據先行、結論後到；如果乜山掃到三層都係方舟，呢個詞就冇任何資訊量。
真正值得跟嘅，唔係個標題，而係嗰堆木頭碎片到底有冇實驗室檢測。冇檢測，就只係一個尚未證實嘅聲稱，講真係仲差好遠。
硬蕉哥整合｜頂硬上
