美國總統特朗普（Donald Trump）落咗諾貝爾和平獎後，對頒獎地點挪威火氣好大，10月25日喺密歇根州一場集會上，公開發炮挪威係「屎坑國家」（Shithouse country），話「坦白講，挪威糟透了」。
幾日後，挪威旅遊局喺官方網站上以幽默方式回應，放咗一連串挪威公共廁所嘅照片，開頭一句問：「這些是世界上最好的廁所嗎？」跟住再寫「挪威讓茅廁再次偉大」（Norway makes shit houses great again!），並表示呢啲廁所「值得一去，無論你是否想去，或者不想」。
圖片：Shealeah Craighead／Public domain／Wikimedia Commons
指南入面嘅廁所大多建築風格獨特，可以俯瞰峽灣、河流同瀑布，景色一流，其中有幾座更獲過國際獎項。旅遊局話呢啲廁所「邀請您放慢腳步，盡情欣賞美景，即使您沒有方便的需求」。
旅遊局高級顧問葉戈羅娃（Evgenia Egorova）接受挪威國家廣播公司（NRK）訪問時話，社交媒體上嘅反擊反應熱烈，「我們當時想，不如用友善和一點幽默來迎接他們」。卑爾根大學修辭學教授克耶爾森（Jens Kjeldsen）評價呢個回應「恰到好處」：「這就像幼稚園的惡霸，如果你認真起來，那惡霸就贏了。」
硬蕉抽兩句：同一啲嘢，一個靠罵聲賣騷，一個靠禮貌埋單。總統把一國人當廁所，結果對方真喺度賣廁所，仲賣出咗品牌。講真，呢啲廁所我哋睇完真係想飛去——唔係因為要方便，係因為佢哋景色真係好。下次邊個再叫佢屎坑，記得話佢：「去之前先查下攻略，嗰度有幾間獲過獎嘅。」
