近幾日，一段喺日本東京新宿一間酒屋爆發嘅食客互毆影片喺社交網絡瘋傳。兩枱講普通話嘅客人因為一個口角，喺店內大開拳腳，現場有人手持酒瓶破口大罵、掌摑推撞，更有人怒掟玻璃杯，碎片四濺，場面混亂到驚動日本警視廳到場調查。
事件嘅起因，據現場目擊者同網上帖文透露，係一名講普通話嘅女遊客喺店內點選高檔清酒「新政」，疑因店長送錯酒款。女方認定店家態度不良，更質疑對方「故意針對中國人」，當場情緒失控，喺店內大吼大叫要求店長道歉。
未料呢番舉動惹到鄰枱疑似同係講普通話嘅客人，佢出言替店長解圍，仲語帶諷刺拋出一句「中國人在外面大聲吵吵」。呢句瞬間踩中女子神經，雙方迅速爆發罵戰，再由口角升級為肢體衝突。
影片顯示，一名身穿白色上衣嘅長髮女子情緒完全失控，手持清酒瓶站起身，向鄰枱一名戴漁夫帽嘅男子大罵，並當場連環掌摑對方兩巴。戴帽男子嘅同桌友人見狀還手，雙方隨手爆發推撞拉扯，白衣女更向鄰枱客人怒掟玻璃杯，碎片四濺。
圖片：Basile Morin／CC BY-SA 4.0／Wikimedia Commons
同行友人拉開白衣女子試圖勸阻，連聲喊「可以了，可以了」，但女方依然怒氣未消。現場一名勸架男子喺推擠中不斷叫「不要動」。混亂中，店員同周遭日本客人嘅日文對話清晰可聞，情況失控準備報警。最終在旁人合力將雙方拉開後，日本警視廳警員方到場調查。
衝突片段迅速喺日本社交平台瘋傳，大批日本網民留言狠批涉事者「酒品極差」，「丟臉丟到國外了」、「無論背後有甚麼藉口，先動手打人砸杯的就已經輸了」。
其實喺日本，動手打人不論國籍都屬違法。根據日本《刑法》第208條「暴行罪」，對他人施加暴行但未造成傷害者，最高判處2年以下有期徒刑或30萬日圓（約1.5萬港元）罰款；若導致他人受傷，則升級為第204條「傷害罪」，最高可處15年監禁或50萬日圓罰款。外國人若被捕，可被拘留調查最長23日，罪成更可能被即時遣返，並被列入黑名單，5至10年內禁止入境。
姣姐講多句：唔係你唔識打，係呢間居酒屋唔夠大。出咗門飲酒，酒品即人品，玻璃杯易碎，麪皮都係。喺外國出咗事，最緊要記住：唔好同酒桌嗰位講「你X你媽」，因為佢哋聽唔明，但警察聽得明。
黃姣姐整合｜頂硬上
