近日一名新加坡男旅客喺香港期間，喺 Threads 上載短片問：「我像香港人嗎？你們會猜我是香港人嗎？還是哪裡人？」呢個問題竟然引發全港網民圍觀，留言區變成「香港人速成班」，PO主每日認真「交功課」，硬生生練成四日連環。
第一日：笑容太燦爛秒被識穿
首日PO主面帶燦爛笑容，結果被網民一面倒打回：「你感覺太nice了，笑容還很好」、「黑口黑麪先係香港人，同埋隨時要準備同人MMA」。有網民甚至開出量化公式：「耐性 -20%、步速 +40%、笑容 -50% 咁應該就快合格」。
第二日：收起笑容但用力過度
虛心受教嘅PO主第二日曬出「走笑容版」：「我像香港人嗎？這次我不笑了。」但網民即時指出破綻：「香港人的不笑是整個面部都是放鬆的resting bixxh face」，仲提他「好像只睡了5小時那樣，然後要走快一點」，更有自稱香港人嘅網民喊「你行得有點慢，加速1.5倍數會比較傳神」。PO主自己都喊：「好難當香港人喔。」
第三日：極速暴走依然失手
第三日PO主自稱「速度超級超級快」，但網民直言「快，不是跑，你沒有那種從容不迫，但很迅速的感覺」，仲有熱心網民「親自拍片教學」，叫他學「雙腳要像鋤地但又要快」，以及保持「一臉煩地嫌『全世界都阻住地球轉』的表情」。
第四日：表情到位終於「畢業」
第四日PO主喺鏡頭前呈現自然放鬆神情，宣佈係最後一part：「沒有速度了。哈哈哈哈。有沒笑和笑起來的，還有…沒有油髮了！」呢次終於獲得網民點頭：「睇曬4條，呢個頭5秒唔笑嗰陣，真係似」、「越嚟越似了，畢業了」。不過仍有網民笑言「眼神太清澈喇……感覺係生活愉快嘅人」，打趣「不笑像呼吸困難」。
離港前夕，網民整合特訓前後對比圖，笑話他「由內至外散發HK人的『光彩』」，仲温馨提醒「下次可以學埋zip位行路！」
姣姐講多句： 全港最認真嘅「非本地人認證」，竟然就係嗰班口口聲聲話想移民嘅香港人。由陽光紅潤練到「面都青埋，西口西面」，呢個速成班嘅畢業標準，都係用我哋全港社畜嘅血淚換嚟。最搞笑係佢由「滿面笑容」練到「返工返到面都青埋」，都唔知自己係唔係「讀到」真係成個都「黑口黑麪」到「同埋隨時要準備同人MMA」。全港人笑埋一日，他「老懷安慰」，我哋「老懷」都笑到甩位。
