深圳一位做代駕嘅何先生，因為返去上班，留讀中一嘅仔仔成日成日開電視，就決定自己寫一個「答題鎖」APK，魔改部電視做防沉迷。
點樣做？據報道，何先生喺接單空檔用 AI 出主意，將原廠開機廣告拆走，換入一套跟學校進度同步嘅中數英題庫。電視每播10分鐘就強制彈出一題，答對先至可以繼續睇，答錯即加題，答錯嘅題目仲會入後台錯題庫，之後重覆出現，睇住就似温習 App 嘅錯題本。
仔仔當然唔會甘願。拔電源、重開機，以為就可以重置？何先生早有對策：修補開機啟動同 ADB 偵測嘅漏洞，用守護進程設定電視一開電就強制載入答題視窗。父子二人就係咁把個客廳變成技術擂台，仔專揾 Bug，老爸負責補 Bug，連英文説話題都已經加咗入去。最後仔仔放棄掙扎，平靜坐喺螢幕前，用遙控器逐題逐題答。
據報道，短片曝光後喺網上引起熱議，有大批家長喺留言區跪求公開原始碼同安裝教學，甚至嘅到電視廠商出廠就應該內置類似設定，認為呢種用娛樂強綁學習嘅設計，比起坊間「到時就關機」嘅官方青少年模式，更加對症下藥。
不過何先生自己表示，因為好多用户缺乏資訊安全背景，貿然開放原始碼或教學，有機會引致用户屋企區域網絡出現安全同私隱外洩風險，所以要先解決漏洞先至考慮教學分享；同時佢亦冇否認呢套系統有變現嘅可能，目前正在評估商業化面唔面對嘅合規風險。
何先生自己將呢套做法視作同仔之間嘅博弈遊戲，仲公開鼓勵仔仔自己揾方法破解。用佢嘅話講：「老竇寫 Code，阿仔找 Bug。」
姣姐講多句：呢個係真正嘅「技術攻防」，同以往見到嘅 parental control 唔一樣，唔係鎖機，而係逐層補漏洞。不過，一個代駕司機用接單空檔同 AI 寫出一個能抵住自家仔攻擊嘅系統，呢個工程能力，真係要認真誇佢一下。
