今日有港人喺 Facebook 群組「香港公營房屋討論區(FB版)」發文，用算數方式比較住公屋同買居屋嘅每年開支，結論係「好明顯住公屋係唔著數」。
樓主喺帖文指：「公屋加租每月2,000元，X12個月=24,000元，5年便收了我12萬」。相比之下，居屋每年「養樓費」（差餉、地租、管理費）約13,000元；若逢10年一次大維修，280呎單位大約只出3萬至7萬元，如果居屋户數達3,000户，「維修費用就更加平」。該帖文直言：「如果咁樣計法，好明顯住公屋係唔著數，而有啲公屋户每個月要交3,000至5,000蚊租，佢哋仲以為自己好幸福，其實都唔知幾戇居！」
帖一出，網民紛紛指出樓主計漏咗最重要嘅一項：供樓。有人反問：「居屋1年用萬3？你未計要供樓喎」、「最優先要計入去嘅，反而完全忽略，最辛苦供樓嗰部份去咗邊」。另有網民直斥混淆視聽：「居屋使唔使供樓呀？叫AI計畀你睇下，問銀行借300萬按揭，30年後實際要連本帶利還幾錢呀，居屋好過住公屋你都講得出？人人咁有錢full pay（全額付款）唔使畀利息呀？」
資料圖片：Pixabay
網民亦提出居屋大維修及雜費未必如樓主想像咁理想：「年輕人，大維修$15萬走唔甩」、「哪有咁平！睇地段，差餉同管理費都唔平，九龍區激貴，基本上同私樓差唔多」；又有人自報家門：「我住新界居屋800幾呎，每季差餉$2,8xx，管理費1個月$9xx」。
另一方面，網民亦列出公屋好處：租金平、維修由房署負責。「公屋漏水 =房署事，居屋漏水 =業主事。多年裝修經驗話你知，單單1項漏水花費已經可以係由幾萬銀至10幾萬嘅事，住公屋整唔整到都唔關你事」；「當你住過劏房，每個月要交$6000-$7000租，你就會明白住公屋有幾幸福！」。
背景方面，房委會資助房屋小組委員會早前已通過公屋租金上調2.04%，相關調整自今年10月1日起生效。受影響住户平均每月需多繳約51元租金，個別租户每月實際上則多交10元至128元不等。房委會表示，按《房屋條例》第16A條法定機制，須每兩年按收入指數變動檢討公屋租金；政府統計處處長編製嘅報告顯示，2025年收入指數較2023年高出2.04%。
姣姐講多句：呢單計數睇到最尷尬嘅，係樓主自發自願咁認真算埋「5年交12萬」，完全無計供樓同利息——成文係「我買樓就唔使供」嘅計算方式。呢種「計漏重點」嘅對比，好似有人計「自己煮飯唔使食外賣就平」，忘記要買米買菜。住屋開支計算最忌係抽走最大一筆支出再同其他人比，呢個梗唔係「着數」，係自欺。
