森美蘭州晏斗油棕園發生1宗離奇偷牛案，1名男子竟將1頭體型龐大嘅活白牛硬塞入日產私家車後座，被附近村民圍截當場逮捕。
10月19日下午，馬來西亞森美蘭州晏斗（Rantau）一帶嘅油棕園內，附近村民發現1輛形跡可疑嘅日產（Nissan）私家車，走近一睇，竟發現後座竟然塞住1頭活生生、體型龐大嘅白牛。村民即刻合力截停嗰部車，當場制服咗坐喺駕駛座嘅巫裔男司機，報警交差。
呢個畫面即係「認真做一件荒謬事」嘅教科書級例子。人哋偷嘢，至少知用個袋或者個箱裝走；呢位老細倒好，成頭白牛直硬塞入後座，想開住走。車仔冇位，乜都塞唔入去，呢個都真係「塞車」塞到極。
事發後，目擊者將現場片段上載社交平台，隨即引起大批網民討論。網民笑：「點會有這麼笨的賊？」、「頭次見有人偷牛，將牛放私家車後座」。亦有人同情白牛：「天呀，呢頭牛幾痛苦」、「將這麼大的動物塞入車廂，不是虐待行為嗎？」
資料圖片：Pixabay
其實呢種「私家車載牛」喺馬來西亞真係唔罕見。2020年1月，吉蘭丹州哥打巴魯有2名男子喺清晨將1頭偷來的母牛塞入白色私家車後座，失主及村民沿路追截，最終成功拘捕其中1人並救出母牛，並依據刑事法典第379條偷竊罪調查。
2024年1月，彭亨州勞勿亦有4名男子將牛隻塞入 Proton Wira 私家車，卻喺逃跑途中失控翻車，4人全數被捕。
今次晏斗事件，幸得村民及時出手，偷牛賊就冇得得逞。當地警方現正跟進調查，以釐清案件詳細經過及涉案男子嘅動機。
姣姐講多句：人哋偷雞撈快，佢偷牛要等位。呢單最離經背道嘅唔係偷牛，係嗰部日產載唔到。
黃姣姐整合｜頂硬上
