宮崎駿御用作曲家久石讓今年 75 歲，職業生涯已經超過 50 年，按常理早可開始準備淡出。佢如今卻被洛杉磯愛樂樂團任命為「駐團作曲家」（Composer-in-Residence），而且唔係掛名大使，係要實幹嘅長期合作。
呢個合作被洛杉磯愛樂形容為「五年期創作夥伴關係」，由 2027/2028 樂季開始。除咗喺 Hollywood Bowl、John Anson Ford Amphitheatre 同 Walt Disney Concert Hall 三個常設場地屢次演出外，久石讓「會專為洛杉磯愛樂及其觀眾創作新作品」，另加新委託、錄音項目同教育及社區推廣活動。
久石讓喺聲明中稱：「洛杉磯喺我嘅音樂生涯中有特別位置——由我嘅《豎琴協奏曲》同洛杉磯愛樂嘅 Emmanuel Ceysson 喺 Walt Disney Concert Hall 首演，到最近喺 Hollywood Bowl 同 The Ford 嘅演出。」佢並稱獲此任命「深感榮幸」，「未來數季，我期待同呢支非凡嘅樂團探索新嘅音樂天地，並同洛杉磯以至更大範圍嘅觀眾分享探尋嘅精神。」
圖片：Carol M. Highsmith／Public domain／Wikimedia Commons
今年七月，久石讓曾喺 Hollywood Bowl 連續三日開演唱會，期間挑戰金氏世界紀錄。呢次任命明顯係洛杉磯愛樂想將合作繼續落去。
【硬蕉抽兩句】75 歲喺港大概早返屋飲涼茶，佢卻被請去坐落五年期合約。宮崎駿生涯嘅每一部長片動畫，soundtrack 都係佢寫——冇遺漏。西方交響樂界請日本動畫大師入座「駐團作曲家」，係西方對日系動畫音樂多年嘅補償性承認，唔再將之歸入「配角配樂」。
硬蕉哥整合｜頂硬上
