講起認行李，好多人以為自己出足奇招就安全無虞：手柄綁彩色絲帶、蝴蝶結，再加個花笠笠行李套。不過根據外媒《RSVP Live》訪問外國資深機場地勤，呢啲做法其實正正係行李失蹤嘅高發主因。
絲帶一綁，輸送帶先癱 地勤指出，手柄上延伸出去嘅絲帶同蝴蝶結，極易喺輸送帶轉彎位同機器縫隙被纏住卡死，唔單止箱損，更可能令成條分流線癱瘓，成個機場嘅行李都一齊延誤。
箱套遮標籤，機器瞓埋轉人工 自動條碼掃描器非常敏鋭，外加花紋、箱套同飄嘅絲帶都有機會遮擋標籤，令系統誤判。掃描唔過就轉人工，好耗時間；航班即登機嘅話，行李往往趕唔切，就留在機場。
舊貼紙一留，行李以為要返舊地方 有人鍾意保留舊行程嘅小條碼當紀念，但高靈敏度掃描器極易被舊條碼混住，以為箱要送去舊目的地。地勤建議每次出發前，把舊貼紙撕乾淨。
地勤教路：呢幾樣先安全
- 用鮮艷色嘅行李安全帶，平貼綁喺箱中間，唔易卡機。
- 喺手柄貼一小段鮮艷防水彩色膠紙。
- 貼有辨識度嘅貼紙，但千祈唔好貼喺會遮擋機場行李標籤嘅位。
- 買箱時避開黑色——黑色係全球最普遍嘅箱色，失竊風險高，而且遺失後喺失物處有成千上萬個一模一樣嘅黑箱，尋回難度極高。
姣姐講多句：我哋以為自己好聰明，出盡奇招認個箱，原來係喺幫自己製造意外。最「高級」嘅方法其實最簡單：買個唔似大家嘅顏色，就搞掂。
（全文完）
