現年 69 歲嘅老戲骨張國強（KK），近日喺社交平台放片，宣佈自己正式進軍內地最火熱嘅微短劇市場，並公開就近年 AI 短劇崛起一事表態，話自己「偏要對著幹」，要證明真人演更真情實感。
呢次係 KK 首次接拍短劇，劇名《少夫人來自東北3》，係一部愛情短劇。片入面，佢對住鏡頭話「我頭一次嘗試：演短劇！」，現場有工作人員問佢，如視大家都轉睇 AI 短劇，真人短劇仲流行唔流行，佢答：「對！我偏要對著幹！就想證明，真人演更真情實感！」，最後更雙手合十話「我知道你們都愛看 AI，但也別忘了，偶爾來看看老張啊！」
造型方面，佢梳起灰白 All Back 頭、戴圓框眼鏡，着灰色西裝背心配條紋襯衫，手持雕花金屬手杖，站喺歐式莊園城堡前擺 pose，紳士氣質十足，型格魅力同強大氣場絲毫不輸年輕一輩。
網民反應熱烈，留言大讚佢「好有氣質」、「好儒雅」、「真是越老越帥呀」、「短劇由你加入一下子感覺高大上了」，仲有人打趣「搶了男主風頭怎麼辦！」，亦有網民認同佢撐真人演出：「是你演的一定要看了！」、「好有型，真人有感情，又自然，港星的實力派」。
圖片：Tim Wu／CC BY-SA 4.0／Wikimedia Commons
KK 兩年前約滿離開效力多年嘅 TVB，轉戰內地市場發展。佢早前接受《01娛樂》訪問，解釋唔簽長約係因為「想用另外一個形式去合作，因為我想自己多啲時間、多啲個人私密空間，同埋屋企人都想我多啲時間陪佢哋。」
另外，佢亦喺社交網分享過喺片場食劇組三餸飯盒嘅片段，白飯加三款餸菜，仲話「有葷有素確實不錯……有工作心裡就踏實」，展現出專業精神。
姣姐講多句：AI 產能越來越猛，短劇平台呢啲日真係乜都出得嚟，但 KK 呢句「偏要對著幹」講得直白、講得有血性。人賣嘅唔係產能，係情感，呢啲嘢目前 AI 仲未做到。69 歲仲敢出山同機器對打，呢個就係港星實力派嘅底氣。
黃姣姐整合｜頂硬上
