鄭欣宜（Joyce）自2023年全面停工休養後，至今近三年冇再出席公開活動，不過佢喺街上被網民多次巧遇，精神狀態比過往輕鬆好多。今年7月，佢被直擊喺筲箕灣工廠大廈為復出作準備，「金髮孖辮」新造型隨之曝光，好友許廷鏗亦曾透露鄭欣宜已在預備復出。
復出消息一直只聞樓梯響，但近日鄭欣宜前公司星煥國際喺官方YouTube頻道上載咗〈忘記的理由〉呢首歌，唔少網民興奮起鬨，留言寫住「終於可以再聽到你的歌聲了」「感恩再聽到欣宜的聲音」，仲有留言話：「大家留意返，呢首係佢2011年推出嘅翻唱歌嚟，唔係新歌，不過我相信欣宜好快會有新歌帶畀我哋。」
圖片：am730／CC BY 3.0／Wikimedia Commons
事有湊巧，近日網上不時流出鄭欣宜昔日受訪片段，令復出之期再度受到關注。日前有網民喺Threads貼上鄭欣宜接受鄭裕玲訪問嘅短片，片中鄭欣宜分享點解「肥姐」沈殿霞將她嘅英文名改作「Joyce」嘅爆笑原因：「我以係有嗰啲好深奧嘅意思，可能佢係好想我個好開心、好快樂嘅寶寶，原來佢係鍾意Shopping。」鄭裕玲聽咗亦忍不住笑：「係啊！鍾意嗰間Joyce。」欣宜更話：「佢話爭啲叫我Chanel！」
姣姐講多句： 肥姐幫個女諗英文名，原來係從「開心」聯想至「買嘢」，仲差一步要將個女改名成 Chanel，呢種家庭式混亂邏輯，正正就係華星世家嘅家風。
黃姣姐整合｜頂硬上
