日前有網民喺一間糖水舖偶遇「B哥哥」鍾鎮濤，拍帖喺社交平台一出，網民即睇到笑。73歲嘅老男神當日一身淺色恤衫加黑色Cap帽，滿面鬍鬚冇剃，同周圍街坊完全融為一體，坐喺擠爆嘅糖水舖度當個街坊。
呢位網民喺社交平台用「香港街頭吃甜品碰到鍾鎮濤」做標題貼出經歷。相中佢完全冇巨星架子，見到人提合照就毫不猶豫一口答應，仲親切送上祝福。博主帖文難掩興奮，搬出佢經典歌詞寫道：「這不是《季候風》，是《讓一切隨風》！本人太nice了吧。」帖文一出引起網民熱議，對佢「鬍鬚滄桑造型」不彈反讚，有人講「keep有用，完全看不出」。
鍾鎮濤呢個「貼地」唔係做戲。佢當年同章小蕙結婚嗰陣投資樓市，1997年金融風暴一吹，億萬資產全數蒸發，負債逾2億港元，2002年正式申請破產，同前妻婚姻亦告結束。嗰陣由風光跌落谷底，冇錢冇面。
破產唔離去嘅係小佢20歲嘅范姜素貞，佢幫鍾鎮濤處理工作、打理財務，陪佢捱過低潮。2006年破產令解除，鍾鎮濤喺內地重頭搞，撈到風生水起，傳聞今時今日身家已過億。
由破產到逾億，換一個明星大概早坐返喺私人會所開香檳。佢？照樣坐糖水舖、大排檔、茶記，過去更不止一次被拍到喺逼狹茶記同陌生人搭枱食飯，舉止自然隨和。
姣姐講多句：
講真，有錢人唔貼地嘅例子幾多，但鍾鎮濤呢個案例好有參考價值。由負債逾2億破產，再爬返上嚟，全程未走佬、未洗白、未扮大佬。佢嘅「貼地」唔係人設，係真本事。
呢個就似茶餐廳——無論你坐喺邊張枱，飲嘅都係同一隻凍檸茶，冇人會因為你卡上有幾個零就俾你另製一道菜。鍾鎮濤贏喺從來冇覺得自己同呢間茶餐廳有分別。
佢最成功嘅作品，唔係《讓一切隨風》，係「讓一切隨風之後照坐街」。
黃姣姐整合｜頂硬上
