誰話做偶像就一定要瘦成紙片？日本近日搞咗一場專為「有肉」女孩開嘅偶像選拔，名叫「私、おデブ宣言オーディション」（我係肥肥噚），14位參賽者總體重生過1273kg、即係1.2噸，平均BMI高達36.2，一舉突破傳統女團纖瘦美學嘅天花板。
呢場選拔當中，一個暱稱Roma（ろま）嘅女孩，就係因為一則帖文爆紅。佢喺X平台曬出自己喺舞台上嘅照片：148cm身高、132kg體重，身穿白色七分袖上衣同藍色牛仔裙，依然自信滿滿站正。佢仲寫低一句：「好難相信，但呢啲真係冇AI生成。」接著最狠嘅一句來自嘲：「連膝蓋都快看不見了。」
呢句「連膝蓋都快看不見」一出，全網反應兩極。一派被佢嘅自信同開朗感染，留言「我喜歡她的自信，好可愛」「臉蛋超級可愛的」，仲有人話佢有啲似渡邊直美。另一派則忍不住吐槽：「這根本就是別人聽到數字後，會忍不住再問一次『請問哪個數字才是身高？』的情況吧」「原來人的膝蓋是可以變不見的啊」，仲有網民笑佢身形神似哆啦A夢。
不過仲有一派聲音認真多於玩笑，關心Roma嘅健康狀況：「腰會出問題，多注意身體」「希望有一天，妳能跟自己的膝蓋重逢」。讚佢可愛同擔心佢個腰，兩派同時出現，反而令呢單事變得更有人味。
硬蕉抽兩句：唔好笑Roma，笑下先至好。一個敢喺台上講「我132kg、我望唔到自己條膝」嘅人，已經贏過成班需要P圖先至敢露面嘅同行。真正問題唔係佢太肥，係我哋審美嘅標準幾百年一直只有一個尺寸：瘦。日本呢場選拔冇發明新嘢，只係把一直被排除喺「合格」以外嘅人請上枱面，問一句：你哋仲敢唔敢話佢唔夠格？
硬蕉哥整合｜頂硬上
