日本一名70歲婦人智子（化名）8年前喪夫，靠每月約16萬日圓（約7900港元）年金過活，名下有一間已繳清房貸嘅公寓，存款約1600萬日圓（約79萬港元）。得知18歲孫女考上私立大學，她主動向女兒講：「我出100萬日圓吧。」

收到嗰筆錢，孫女特意打電話道謝：「奶奶，真的謝謝妳，我會好好念大學。」剛入學嗰陣，孫女會傳校園相、分享生活，令智子覺得自己重新參與咗孫女嘅人生。

不過半年之後，隨住孫女忙緊讀書、參社團、做兼職，聯絡頻率慢慢恢復原狀。智子偶爾傳訊息關心，得來嘅只係「最近很忙」呢類簡短回覆。佢坦言：「出了學費，也不代表我的心就會被填滿。」

佢後嚟先發現，自己其實喺心底默默期待過，覺得出咗學費之後可以同孫女更常一齊食飯、傾偈，「我只是自己默默期待了。」

智子表示並唔後悔拿出呢100萬日圓，只係後嚟先意識到，心底多少藏住「幫上忙後，或許能在家人心中多一點位置」呢個期待。而家佢再唔會覺得一定要花大錢先可以維繫家人關係，孫女冇主動聯絡，佢就透過女兒瞭解近況，有空再一齊食飯。

「姣姐講多句」，呢單故事最扎心嘅唔係「掏老本」，係佢嗰句「我只是自己默默期待了」——唔係孫女冷血，係老人用錢換位置嗰種卑微，好多港人自己都試過。錢填唔滿嘅從來唔係荷包，係人。

黃姣姐整合｜頂硬上