日本近年傳出多起令人不寒而慄嘅靈堂意外：有男性守靈夜後，被親屬發現以頭部深探入棺木嘅姿勢陳屍棺邊，狀如「被死者帶走」。解剖相驗時，死者往往無外傷、無致命宿疾，初判多數為急性心臟衰竭。
經手超過5000具遺體嘅法醫高木徹也揭開真相：許多死者是在守靈結束後，獨自飲酒、湊近棺木向故人傾訴告別，隔朝便失去呼吸心跳。奪命元兇，原來係替遺體防腐嘅「乾冰」。
日本殯葬業者為防遺體腐敗，常在棺木內塞入10至20公斤乾冰。乾冰昇華後釋出大量二氧化碳，密度比空氣重約1.5倍，會沉在棺底。日本國民生活中心實測：棺木蓋上短短20分鐘，內部二氧化碳濃度已飆破30%，4小時後更逼近90%；就算事後掀開棺蓋，沉底氣體50分鐘後仍高達30%以上，遠超致死門檻20%。
高木法醫指出，二氧化碳無色無味，根本難以察覺。大氣中正常濃度僅約0.04%，達3%便會呼吸困難，超20%極短時間內即可斃命。家屬若在悲傷或微醺中探頭入棺訴説，甚至因疲憊在棺邊打瞌睡，只要吸入一兩口，便可能在幾秒內陷入重度缺氧昏厥。
姣姐講多句
呢種真相最令人後怕，唔係某個人做錯事，而係一個「好好心」嘅道別動作，碰上咗個無聲無息嘅兇手。二氧化碳唔會警告你，悲傷同酒精又令你戒心全失。守靈時好多人以為「唔會有事」，自己一個喺棺邊坐埋，呢個正正係最危險嘅時刻。
高木法醫嘅提醒很直接：瞻仰遺容時切勿將頭探入棺內、靈堂要保持通風、守靈時勿讓親友獨處。悲傷歸悲傷，安全都係要守，別讓最後嘅道別淪為無法挽回嘅悲劇。
