你上次食嘅「撒尿牛肉丸」，可能一粒牛肉都冇。
近日山東電視台《閃電新聞》調查記者暗訪河南漯河、安陽、鶴壁嘅肉類加工產業鏈，發現多間地下工場大量收購帶皮雞頸同剔骨殘渣，經碎骨機打成廉價「骨肉分離泥」（即雞頸泥、雞骨架泥），再大批轉售下游製造街頭烤香腸、即食肉丸同水餃。
現場污水發臭、蒼蠅亂飛。記者喺安陽內黃、鶴壁淇縣直擊，部分生產廠房地面積聚大量發臭污水，工人一邊排放污水，一邊將隨意堆喺地上嘅生雞頸、生雞架拋入機器。調查更發現，部分經營者連食品生產許可證都無，涉嫌無證生產。
最離譜嘅係河南恆雲食品等加工點：生產商直言市面上嘅「撒尿牛肉丸」（即「瀨尿牛丸」）根本毫無牛肉成分，「牛肉味純靠牛肉膏」同牛油調配而成，全賴幾滴化學香精「牛肉膏」調味瞞天過海。加工成型後，廠商喺包裝配料表上涉嫌以「雞肉」或含糊字眼掩飾骨泥成分，甚至公然標記牛肉風味誤導食客。當生產負責人被問及骨泥嘅微生物、重金屬指標同肉質檢測時，竟直言「從未聽説，亦未做過檢測」。
原料端同樣驚人。喺漯河市召陵區，「辰露食品」等多家原料企業專門收購鮮帶皮雞頸進行骨肉分離，每噸出廠價僅約3,800元人民幣（約4,400港元），單日產能超過30噸，而且「不愁貨源」，可源源不絕供應周邊食品加工廠。
食品安全專家指出，「機械分離肉」（Mechanically Separated Meat, MSM）喺國際食品工業並非禁用原料，但前提是原料健康新鮮、廠房符合嚴格微生物同低温冷鏈標準。當前問題核心，在於黑工場無證生產、環境骯髒，下游成品又刻意隱瞞骨泥成分，嚴重侵犯消費者知情權。
歐盟自1990年代瘋牛症（BSE）危機後，明確禁止以高壓方式從牛、羊、山羊骨頭分離肉類，禽類同豬隻嘅機械分離肉，喺符合嚴格微生物同重金屬規限下先可使用，而且必須喺標籤標示「機械分離肉」；美國農業部（USDA）允許禽類MSM，但規定產品唔得標示「肉類」（meat），只可稱為「機械分離禽肉」。
姣姐講多句： 講真，最離譜嘅唔係骨泥本身，係有人成日賣、有人就成日食，食咗成日無聲無息。標籤寫「雞肉」就算完事？「牛肉味」三個字就等於牛肉？生產負責人自己都講「從未聽説，亦未做過檢測」，你叫邊個幫你做？食嘅係自己，知情權唔使求人。
黃姣姐整合｜頂硬上
