杭州王女士透過招聘平台應聘，獲邀參與一場「視像面試」。畫面入面數名西裝畢設嘅面試官對答專業，程序似足大型企業。點知對方要求開「屏幕共享」，不到2分鐘，王女士嘅外賣賬號已經被刷咗超過4.1萬人民幣（約4.8萬港元）。
事件發生喺10月22日下午，地點喺浙江杭州。面試官先問學歷同工作經歷，其後以「人事合規」為由索取身份證號碼，再要求王女士保持端正坐姿、對準鏡頭靜止30秒拍攝「存檔照」。王女士雖覺得程序繁瑣，但見對方嚴謹，便聽從安排。
確立信任後，對方聲稱要「全程記錄面試過程」，要求開手機屏幕共享功能。王女士開啟後不到2分鐘，對方竟要求即時「格式化」手機，聲稱「確保面試機密不外洩」。呢個反常指令令王女士猛然驚醒，正準備掛斷，手機短訊卻已接二連三彈出外賣下單成功通知。
細查之下，她的外賣賬號已被暗中下單：6瓶茅台、5瓶五糧液、1瓶劍南春、1部華為手機、1隻華為手錶及6罐嬰兒奶粉，總額逾41,200人民幣，收貨地址全數指向蕭山機場附近一間酒店。
王女士當刻直奔濱江公安高新派出所報案。警方迅速鎖定送貨酒店並致電核實，得知貨物已被速遞員取走、正安排「同城轉外省寄遞」。警員一邊驅車直撲速遞轉運站，一邊聯絡速遞公司通知禁止發貨。趕抵時，裝滿名酒與電子產品的包裹正準備送上分流線，警方當場全數扣查，距報案僅3小時，全數貨物成功起回，王女士隨後辦理退貨。
警方事後分析，騙徒要求格式化手機，實為消滅通訊紀錄與轉賬痕跡。詐騙核心並非高深黑客技術，而是透過視像誘騙受害人開啟屏幕共享，令手機接收的動態短訊驗證碼在騙徒眼前一覽無遺，從而在後台完成免密碼驗證扣款。同類手法近期喺南京、銀川等多地亦有出現，銀川一名男子即因輕信屏幕共享被騙走逾52萬人民幣。
姣姐講多句： 呢單案最荒謬嘅位，唔係騙徒有多「專業」，而係一個面試流程竟然需要受害人將自己手機屏幕實時直播畀人睇、再將電話格式化。邊間正常公司要你做呢啲嘢？「面試」要求你格式化電話，猶如HR通知你入職前先自願遞交身分證副本再吞食。屏幕共享功能看似方便，實則將你手機螢幕上所有短訊、驗證碼一一呈露。求職心切可以理解，但任何要求你開屏幕共享、提供即時短訊碼、或「格式化」裝置嘅「面試」，即時掛線、報案，唔使考慮。
黃姣姐整合｜頂硬上
