貴州一對夫婦近日鬧到「天翻地覆」，一切源頭係一個凌晨四點嘅電話。
據內地調解節目《金牌調解》11月4日播出內容，事主夫婦早前感情已現裂痕。妻子翻查丈夫手機，發現通訊錄有個可疑號碼，雙方不但頻繁通話，對方更曾喺凌晨四點致電。妻子大起疑心，認定丈夫有外遇。
不過，真正將婚姻引爆嘅，唔係懷疑，而係妻子嘅「報復」行動。佢決定與另一名男性友人到酒店開房、同住三日，以此「以毒攻毒」。呢招一出，夫婦關係急轉直下，信任危機全面爆發。
信任破裂之後，矛盾隨之蔓延到錢包。妻子要求逐一核對家庭日常開支，丈夫卻強烈反對，堅稱全部家計一直由佢一人承擔，妻子「無權過問」，拒絕對帳。雙方各執一牛耳，爭執越嚟越激烈。
口角終究演變成肢體衝突。妻子隨手擸起木凳朝丈夫頭部砸落，致丈夫受傷流血，需送院縫合四針。
事件曝光後，已交由相關調解部門介入處理。
姣姐講多句：一個「報復」開房三日，一個「你無權過問我錢」，兩位都係好有主見嘅「獨立」人士。可惜婚姻唔係賭氣比賽，擸凳之前真係要諗清楚——頭縫四針，貴過酒店三日房費。
