薩莉亞（Saizeriya），成個中國網絡嘅梗係「預製菜之王」，但據日本《PRESIDENT Online》報道，呢個日本平價西餐連鎖喺中國內地嘅銷售額，由2023年8月嘅418.7億日圓（約20.8億港元），升到2026年8月嘅628.7億日圓（約31.2億港元），3年穩升5成。
平價先係硬道理
薩莉亞最硬嘅底牌，係價錢。據前社長堀埜一成著作《薩莉亞經營術》同《經濟觀察網》分析，佢哋逾7成單品售價喺20元人民幣以下——12元嘅吞拿魚沙律（約14港元）、16元嘅米蘭風味肉醬千層麵（約19港元）、19元嘅蒜香蝸牛（約22港元）。食一餐西餐，唔使預留一筆大錢，呢個就係佢哋嘅招牌。
《薩莉亞經營術》寫明，佢哋3大核心競爭力：低成本營運、提供安心又唔難食嘅食物、維持剛剛好嘅環境同基本服務。
便宜唔係靠促銷，係靠一條龍
廉價背後，係一套從源頭到餐桌嘅垂直供應鏈。據日媒《PRESIDENT Online》同日本Yahoo!財經分析，薩莉亞喺全球佈局：喺韓國搭建造價僅日本2成嘅温室大棚，喺澳洲設直營工廠做白醬；透過錯開北海道同其他地區嘅水稻播種期，將大米成本削低三分之一。
資料圖片：Pixabay
店內人手效益亦拉到極致：手機掃碼點餐、顧客自助取水；廚房盡量避開明火，改依賴標準化半成品同精準加熱，加快翻枱率，將損耗同人工壓到最低。
「預製菜」同唔同，其實有規矩
內地國家市場監管總局2024年嘅規範説明講得清楚：連鎖餐飲企業透過中央廚房自行加工、再向自家店舖配送嘅菜餚，不屬於監管範圍內嘅包裝「預製菜」，但仍須遵循餐飲食品安全標準。
消費者未必排斥預先加工，佢哋衡量嘅係：餐廳講得明唔明、出品穩唔穩、價錢啱唔啱。薩莉亞從來冇將中央廚房嘅嘢包裝成高級手工料理，喺資訊透明、出品穩定、價錢親民嘅前提下，食客自然願意「埋單」。
姣姐講多句
被網民貼咗「預製菜之王」個標籤，最贏嘅係佢從來冇否認過，亦冇因為個標籤就變貴。12蚊食到吞拿魚沙律，有邊個唔會排隊？呢個唔係預製菜唔預製菜嘅問題，係值唔值嘅問題。
黃姣姐整合｜頂硬上
