強風吹落一啲嘢入眼，以為係沙塵就郁兩下，呢個「常識」原來會要命。浙江一名41歲男子陳先生，早前喺公園散步被迎面強風打中，即刻劇烈刺痛，佢以為只係普通入沙，冇即刻處理，淨係用手郁、強忍。數日之後，眼不但冇好，反而出現嚴重充血、畏光流淚，到院檢查，眼入面竟然密密麻麻藏住大量黑色細長「針狀異物」，角膜仲被刮到傷晒。
據《瀟湘晨報》報道，陳先生喺浙江省中西醫結合醫院（杭州市紅十字會醫院）眼科求診，向醫生形容：「醫生，我眼睛難受得厲害，又紅又怕光，總覺得裏面有東西在磨。」接診嘅李秋實醫生安排裂隙燈檢查，發現瞼結膜嚴重充血，大量黑色針狀異物深嵌喺眼瞼邊緣同結膜褶皺位。
因為異物分佈範圍極廣、位置零散，肉眼幾乎睇唔全，加上陳先生事後反覆郁眼，令細刺不停喺眼球表面摩擦，全角膜上皮出現大片刮傷。李醫生推斷，呢啲細針極可能係強風吹落嘅植物葉片毛刺，或者果實表面嘅保護性硬毛。
處理時，醫生為陳先生做眼部表面麻醉，用眼科專用顯微器械，針對眼瞼邊緣、上下瞼結膜同結膜穹窿等深層死角逐個位置「地氈式」搜尋。醫療團隊最終花咗超過1個鐘，先夾出50多條黑色針狀異物。
覆診後，陳先生眼部紅腫同異物感已消退，受損嘅角膜上皮正逐漸癒合，視力無永久損害。
姣姐講多句
50幾條黑針、郁到1個鐘先清晒，呢個就係「自己郁」嘅代價。以後眼入有嘢，千祈唔好郁，快啲眼藥水沖、快啲睇醫生，呢啲係小學常識，唔好再用「忍嚇就冇事」去賭。
