2024年8月28日，加拿大精靈航空（Flair Airlines）一班飛往紐芬蘭鹿湖（Deer Lake）嘅航班，出現咗成班機都唔會忘記嘅鬧劇。56歲男子潘瑟（Corey Pancer）同同行女子博伊曼（Deborah Bojman）喺起飛後不久便情緒失控。
潘瑟升空後即擅離座位，拒絕聽從機組指示，沿路用粗言穢語辱罵機組人員；落座後又拒扣安全帶、脱衣赤膊。到餐飲時段佢想買嘅嘢缺貨，情緒再度爆炸，對空姐厲聲叫囂出言恐嚇。
博伊曼就更盡興。佢喺全機數十名旅客面前，將腰以下所有衣物脱光，下半身赤裸喺客艙走廊來回徘徊，兼不停對乘客及機組尖叫，場面極度混亂。
圖片：CambridgeBayWeather／CC BY-SA 3.0／Wikimedia Commons
兩人荒唐行為令機組要分心應付，嚴重威脅航機安全。事件最終喺紐芬蘭科納布魯克（Corner Brook）法院審結，2人各被控危害飛行中航機安全及干擾他人合法使用財產2項罪名，並認罪。
博伊曼早前已由另一名法官判罰款4,000加元（約2.2萬港元）。潘瑟隨後續審，主審法官痛斥佢行為嚴重威脅航機安全，直言「原本想判坐監」，惟基於同案量刑一致原則，加上控方僅提請罰款，最終潘瑟同樣被判罰4,000加元。
姣姐講多句： 法官都話「本應判監」，最後不過係張罰單——4,000加元喺加拿大大概就係請全機食幾晚自助餐嘅價。機組同無辜乘客要受嚇嘅，就你一人買單幾杯咖啡就翻盤？量刑呢度落差，真係值得「再研究」一下。
