非牟利組織 Fireside Project 喺2020年成立，設咗一條專責致幻劑支援熱線，接聽正在經歷致幻體驗或體驗結束後有困難嘅求助者，由受過訓練嘅義工提供保密嘅同儕支援。研究團隊整理咗2021年4月至2026年2月期間共25,419次匿名通訊，由220名熱線義工處理，相關研究今週刊於《Science Advances》。
研究團隊形容呢份數據庫係「史上最大規模嘅致幻劑支援互動資料庫，規模超過所有已刊發致幻劑臨床試驗樣本總和嘅一個數量級」。數據涵蓋致幻蘑菇（psilocybin）、LSD、大麻、氯胺酮、MDMA、ayahuasca 等多種物質，打開咗一扇觀察臨床環境以外致幻劑體驗嘅罕見窗口。
負責研究嘅加州高級意識研究學院（Institute for Advanced Consciousness Studies）資深研究員 Félix Schoeller 表示：「我們嚴重缺乏地下世界以外的致幻劑治療數據和證據。」佢同時指出，部分文化與社群對呢類體驗已有數千年實踐，但點樣按生物醫學科學原則去系統研究，仍然係個未解之謎。
數據顯示，約40.2%嘅來電者（10,208次互動）喺打電話嗰陣正處於致幻狀態，32.1%則喺體驗結束後的「統合期」（integration）致電。其餘涉及物質資訊查詢、購買諮詢，或由陪同者（trip-sitter）代為求助。
資料圖片：Pixabay
最常見嘅物質報告為致幻蘑菇（9,348人），其次為 LSD（2,247人）、大麻（2,004人）、氯胺酮（1,194人）及 MDMA（682人），ayahuasca 及其他物質記錄數量較少。
最出人意料嘅係大麻使用者嘅困擾率（distress rate）——47.2%，為所有物質入面最高。研究指出，大麻雖被普遍視為低風險物質，但數據證實佢確實可以在部分個案引發需要害減關注嘅嚴重不適；其他常見致幻劑嘅困擾率僅略低。
姣姐講多句： 講真，呢個研究最狠嘅地方就係打破咗「草就係草，唔會出事」嘅刻板印象。47.2%嘅困擾率擺喺度，任何「安全」嘅説辭都即刻失靈。想接觸呢類物質嘅朋友，知道唔知係乜嘢，同知道出事有邊個幫手，係兩回事。呢條熱線嘅存在，本身就係一種保障。
黃姣姐整合｜頂硬上
