最近 Threads 上最真實嘅「反生仔」廣告，係一個 32 歲女子自己開嘅。佢同老公對生育猶豫不決，發文請益：「大家可以跟我説生小孩的好處嗎？」帖文吸引 1 萬人按讚，本來以為會捱住一籮雞湯，結果討論區即刻變成「過來人」潑冷水大會。
有網友好寫實地建議：先試連續 5 個月、每隔 2 小時起身 20 分鐘，體驗一下照顧嬰兒嘅作息，再決定生唔生都唔遲。有人更直接：「問就是一律建議不要生，能救一個是一個。」
不過都有父母分享好嘅一面：一個小朋友即將滿 4 歲嘅家長話，雖然養仔花錢又費力，「這4年每天都覺得很幸福」；有人生病時仔仔主動端來温水同藥，即刻令佢忘記所有不想生嘅理由。
不過最殺梗嘅係一名育兒近 15 年嘅家長，用 humor 列出 7 項「好處」：幸福門檻降低、認清自己的報應、體驗無薪勞動、激發大腦潛能、發掘驚人耐心，甚至「熟悉刑法規定及出養流程」。最後一句：「原來世界上真有付出勞力卻沒有收入的工作。」
有網民點出點解呢個問題好難喺網上得到公證答案：「痛苦發生一次就能被記得，而快樂和幸福會變成日常瑣碎，會被習慣。」
呢場討論其實反映到少子化背後真實困境。依台灣內政部 2026 年第 1 季數據，房貸負擔率達 41.46%，台北市更高達 64.41%。生唔生仔，從來都唔只係個人選擇，而係一筆寫住房價、薪資同托育資源嘅帳。
姣姐講多句 講真，生仔呢個問題根本冇標準答案，但睇住呢場討論，最搞笑就係：你以為自己問嘅係「benefits」，結果收到嘅係「terms and conditions」。想清楚先簽，唔使 rush。
