一名喺香港中文大學讀碩士嘅內地生近日喺小紅書發文，揭開學首周同老母視像，老母問「班上有冇外國同學」，佢答全班清一色講中文，老母隨口一問「咁30萬學費係咪白花」，佢話入學兩個月先徹底想通：呢度唔係留學，係來攞身份。
佢透露，開學第一天就發現全班60人入面只係3個人會講廣東話，其餘口音橫跨大江南北，日常小組討論全部普通話，放學一齊食麻辣燙，微信群組名直接叫「港漂一家人」。佢直言開學初期都曾問自己「這到底算不算留學」。
不過佢話想通咗「同學是內地的，機會是香港的」：教授係海外名校迴流學者，圖書館通宵開放，招聘會有中環各類跨國企業，資源同同學講乜語言毫無關係；加上本科非名校出身，能坐進中大課室已經係人生一大跨越。佢話「文憑只是入場券，身份才是底牌」，班上大部分人目標都明確——畢業拿 IANG 留港工作，滿七年換永久居民身份證。
帖文一出即引起網民熱議。有網民指本地公司重實務執行力，「商界是用人才，不是聘人才來供的」，批評內地生「普遍想用高些學歷去一步登天，不願從低做起」。大批內地網民反駁係大環境所逼，「如果沒有碩士有些崗位連面試機會都沒有」，「很多專業捲到本科生基本無法找到合適的工作」。
至於攞身份，多位自稱「過來人」嘅網民指留港續簽遠比想像中嚴峻，「來港讀碩的98%都等不到第三年續簽就離開了，因為根本找不到正式的工作」，「賣保險沒有業績，照樣續不了」，更有網民稱「手停口停唔使指望可以退休」，直説不如留喺內地。
姣姐講多句，30萬學費換一個身份證，呢筆數好耐都算唔清。不過講真，全班60人坐埋一齊講普通話食麻辣燙、群組名「港漂一家人」呢幅畫面，本身就已經係最真實嘅答案。
黃姣姐整合｜頂硬上
