現年61歲的「喜劇天王」張衞健（Dicky）同52歲太太張茜，早前喺北京一間餐廳室外抽煙時，被網民拍得先後將煙頭丟向行人通道旁柵欄的花盆方向。影片一出全網轟動，質疑兩夫妻缺乏公德心、仲埋下火警隱患，多年來嘅正面形象一時間受損。
張衞健冇選擇沉默，事發後火速接受《東網》獨家訪問，更親自曬出當日喺該處抽煙的現場照片還原真相。佢出示相顯示，該花槽後方其實一直設有專用煙灰缸，只係入夜後環境昏暗，加上拍攝角度同鏡頭盲點，先至令網民以為夫妻二人將未熄滅的煙頭直接拋入堆滿枯枝落葉的花盆。
講到應變，Dicky 可謂港娛高EQ教科書。佢喺短訊回覆入面改編自己經典代表作《你愛我像誰》歌詞自嘲：「其實……你愛我像誰，其實……花盆後面有煙缸！」隨手再搬出金曲《真真假假》笑稱：「真真⋯⋯假假⋯，只要相信他」，一句歌詞加一張相，就將指控拆個徹底。
「姣姐講多句」，放大鏡文化幾時都係照邊邊都照到煙頭，一個角度盲點就將人打成沒公德心，正係呢種「未審先判」令人啼笑皆非。張衞健冇硬碰硬、冇開炮，用一句歌詞加一張相把誤會澄清，既保住格調又冇失幽默，呢招「高EQ借歌洗冤」，真係唔錯。
（示意圖）
黃姣姐整合｜頂硬上
