呢次個賣點，就係朴敏英同陸星材扮返一對「姐弟戀」。
劇情改編自中國電視劇《理智派生活》。朴敏英飾「邏輯100%」嘅女強人姜伊智——工作面前冷靜到滴水不漏，一到愛情就笨拙得可愛；陸星材則演「温暖100%」嘅深情年下男韓善宇。一個係冰一個係火，劇中要一齊揾「On & Off」即係工作生活平衡嘅羅曼史答案。睇上去就係個打工仔都感同身受嘅設定。
同場嘅仲有：高洙飾能力爆表嘅菁英本部長朴賢泰，光靠實力評員工，係個有氣場嘅上司；朱賢英飾姜伊智嘅親近妹妹、做咗七年全職主婦嘅申智媛，負責影全職主婦嘅現實煩惱，兼做姜伊智嘅「最強助攻」，帶出好多笑位。官方指幾位主演第一次碰面就完全投入角色。
姣姐講多句：韓劇近年「年下男」配「女強人」嘅組合漸成潮流，但真正令人難忘嘅，係對角既要有火花又要有真實感。朴敏英演「冷」，陸星材演「暖」，一冷一熱先有戲；最怕就係對角拍得太温，暖到同白開水咁，看完冇感覺。11月25日見真章。
黃姣姐整合｜頂硬上
