中大中醫健康月｜免診金義診 專家講慢病「預防治療調養」
香港中文大學中醫學院中西醫結合醫務中心將於11月上旬展開為期一個月嘅「中大中醫健康月」，為社區人士提供中醫健康支援。其中11月9日至12月9日期間，醫務中心將特別提供免內科診金嘅中醫義診；其餘內容包括巡迴展覽及健康講座。活動地點喺沙田威爾斯親王醫院舊座4樓4L。
呢次活動由中大中醫學院專業顧問李文鶴博士撰文介紹，主旨係推廣中醫處理慢性病嘅思路。佢指出，現代人常見嘅高血壓、糖尿病、失眠、甲狀腺問題等慢性病，患者往往需要長期服藥同管理，而中醫嘅特點係「不只看病，更看人」，強調「預防、治療、調養」三位一體。
李文鶴博士引述《黃帝內經》嘅「治未病」思想，講「未病先防、已病防變、瘥後防復」，並提出透過中醫體質辨識（氣虛、痰濕、陽虛等）幫人及早調整生活習慣。面對人口老化帶來嘅「多病共存」問題（即一個病人同時患有兩種或以上慢性病），佢指中醫可以透過辨證論治，以一個處方兼顧患者嘅多種症狀，而唔係單純按唔同疾病分別開藥。
資料圖片：Pixabay
治療方法方面，佢強調中醫唔依賴單一手段，除咗中藥、針灸、拔罐、天灸、穴位療法、按摩推拿，仲可按情況配合足浴、香薰、音樂療法、中藥蒸薰、氣功等。慢性病治療後，佢亦提倡透過食療（例如適量選用苦瓜、山藥、葛根等）同太極、八段錦等傳統運動，將養生融入日常生活。
姣姐講多句
呢單仲有免費嘅嘢，即係11月9日開波到12月9日嘅免內科診金義診。想驗嚇自己係乜體質、又或想問下三高，都可以行去沙田威爾斯親王醫院舊座4樓4L睇嚇；查診電話係 2873 3100。講真，免費嘅嘢攞先啲啦，唔好等身體叫你攞先至攞。
黃姣姐整合｜頂硬上
