長途飛機最殘酷嘅一刻，就係值機睇到自己坐喺經濟艙中間位，左邊右邊各坐返個唔認識嘅人，仲時不時要鬥「邊個有權靠扶手」。
扶手歸邊個？專家話歸你
加拿大禮儀培訓公司 Applied Communication 創辦人、國際禮儀專家 Adeodata Czink 就話，靠窗位有窗景、有牆靠，走道位有自由進出同伸腿嘅空間，中間位兩側受夾、咩額外空間都冇，所以中間座位兩側嘅扶手「理應歸中間乘客所有」。
禮儀諮詢專家 Jodi RR Smith 補刀話，原則上係你嘅，但如果鄰座個位真係大到冇位坐，友善講句、適度共享，旅程會平穩好多——講白啲就係「有得讓就讓，但你要知道係你讓嘅」。
Qantas 送三招，唔使離座
資料圖片：Pixabay
澳洲航空 Qantas 針對機上狹窄位推了一套座位內伸展，唔打擾人：
- 頸胸：雙手交扣放腦後，手肘慢慢向兩側打開；頸部左右傾側，每邊 10–15 秒，專治低頭睇手機。
- 小腿：腳掌離地勾腳尖，再做足踝泵血運動（Ankle Pumps），每 30 分鐘一輪，專治「落機腿麻、腳腫」。
- 側腰下背：坐直，雙手交扣舉高向左右微微側彎，外套捲起墊腰後；千萬唔好扭身扭到手肘打到鄰座。
姣姐講多句
中間位嘅「雙扶手權利」同「機上運動」，表面係旅遊貼士，實係一門「點樣同陌生人分享平方釐米」嘅生存學。記住：你靠扶手靠得越理直氣壯，你個位就保得越完整。
黃姣姐整合｜頂硬上
