煮即食麵，多數人嘅流程係等水滾，先落麵同調味料。但有位女網友近期喺Threads爆料：佢發現阿媽一直係「反其道而行」，先將麵同調味料放落冷水，再一齊開火煮。佢話40多年來第一次知道原來有呢種做法，即時上網發問，貼文馬上引起兩派爭論。
佢喺帖文問：「大家煮泡麵都是等水滾了才下麵跟調味料？還是冷水直接下？」跟住就係口水仗。
支持冷水下麵嘅一派，有帖文話「我就是冷水下麵，麵條會Q」；亦有帖文自嘲「我喜歡吃爛麵，所以一律冷水下鍋，不用煮太久麵就爛了」；仲有人話「我的煮法（跟原PO媽媽）完全一樣欸，沒耐心等水滾，直接冷水全部上，等全滾了就可以吃了」。
但另派則堅持要等水滾：「冷水下調料，然後水滾下麵和雞蛋啥的配料」、「水滾後熄火再放麵，我無法接受麵爛掉」，甚至有人話「以前都冷水下麵，後來改成滾水下麵，單純是滾水下麵比較好吃」。
資料圖片：Pixabay
最有用嘅係，有自稱內行人嘅帖文指出，關鍵其實喺麵體：「台灣泡麵不適合這樣煮（冷水下麵），韓國泡麵才可以，最主要還是要看麵體」。簡單講，唔同一類型嘅麵餅，落水嘅時機都唔一樣，所以「冷水」定「滾水」從來唔係黑白之分。
日本更早幾年前已推出「冷泡版杯麵」，專用麵條注入約5度至10度嘅冷藏水，等約5分鐘即可恢復Q彈滑順，完全唔使熱水或冰塊。
姣姐講多句： 呢場仗鬥到面紅耳赤，其實鬥錯方向喇——關鍵從來都係麵餅，唔係你嘅水温。下次煮麵，先睇下自己買咗邊款麵，唔好再喺廚房同阿媽鬥水温，鬥完仲要食同一碗嘢，好傻。
黃姣姐整合｜頂硬上
