日前 Threads 一個帖，有一位喺公屋長大嘅港男，見到人話「400幾萬」買到啟德「居屋樓王」，有感而發，憶起細個想自排公屋，老爸一句「諗都唔好諗」打回，萬分無奈。
細仔想自排公屋，老爸：「諗都唔好諗」
樓主話自己係「公屋仔」，讀大學時見到同學成功申請到個人公屋，「大開眼界」，就「即刻學嘢」，回家同户主老爸提議自行申請。佢話當時18歲，無收入，想「搭阿嫲」一齊排，提早派到單位。
但老爸「講極唔明」。佢話最怕一個嘢：一旦細仔申請成功、要搬出，户口數目減少，單位會「由大變細」。老爸擔心到「發老脾」，叫佢「諗都唔好諗」。
樓主話「其實屋企人好影響到性格嘅形成同未來嘅生活」。
鄰居換走，佢再勸都無效
時間一轉眼，樓主見「左右鄰居都換晒做居屋」，再向父親提出，老爸「依然唔肯換」。佢很無奈：「明明有返工」、「冇拎過綜援」，「但唔明點解要守著間租嘅公屋」。
帖文引起網民熱議。有網民話「唔同年代嘅人，對安身嘅定義都唔一樣」，亦有過來人話曾勸老爸交公屋抽居屋、由佢同細佬供樓，但老爸都唔肯，「後來我同細佬都各自上咗車，開心自住中」。樓主話自己而家已搬離原生家庭，「努力靠自己生活」。
樓王係邊個？
房委會10月13日公佈，「居屋2025」由10月21日起選樓，推售5個新項目合共近7,000個單位，售價約150萬至480萬元。啟德新項目「啟陽苑」，售價219萬至480萬，被網民封做「居屋樓王」。
姣姐講多句
呢單故事笑在「父愛」嘅直覺，錯失一個樓王。老一輩對公屋嘅執着，源於「冇咗公屋好難拎得返」嘅集體創傷，唔係單純嘅貪或保守。但呢種「直覺」，換到呢個世代，就變成「上唔到車」嘅痛。
公屋仔想行自己路，老爸叫佢「諗都唔好諗」，結果「諗」到最貴嗰度——啟德樓王。
