內地一名男子日前喺網上分享太太訂立嘅「6S級」極致浴室規矩，影嘢吸引數十萬網民瀏覽，一係讚一係呻，仲有人話「與其同住壓力極大」。
呢套規矩係邊種水平呢？沖涼前要先用水桶儲起前段冷水備用；洗完嘅內褲襪子要分類夾起；每條毛巾有專屬衣架唔得混用；洗完身枱面、牆面、地面全部要用專屬抹布逐件擦乾；枱面污垢一星期清一次；去水位定期掃毛髮；連沐浴露洗頭水都必須傾斜45度擺好；肥皂盒積水要即時倒乾，連馬桶刷都分外刷、內刷、自用刷同客用一次性刷。
一句講完：呢個唔係浴室，係生產線。
成件事最搞嘅位，係有網民質疑部影嘢係「擺拍」博流量，亦有人認真讚太太持家有道，仲有人順住感嘆洗手間係家庭矛盾高發地點。
資料圖片：Pixabay
事源其實係「搶廁所」呢個真實痛點。傳統公寓喺同一格空間塞晒洗手台、馬桶、花灑甚至洗衣機，一人入面全家就「癱瘓」；而女士朝早護膚化妝時間較長，撞上有如廁需求，氣味加濕氣真係叫人崩潰。
室內設計師近年推崇「分離式設計」，列舉四招低成本改造分流：
- 洗手盆外移，移到過道或走廊，吹頭剃鬚唔再佔用廁所；
- 坐廁獨立隔離，用輕隔間或長虹玻璃擋住異味同保障私隱；
- 下沉式淋浴區，配合擋水條或玻璃趟門，水唔會浸滿地；
- 嵌入迷你洗衣位，縮短洗滌動線。
該自媒體帳號則指出，喺寸金尺土嘅中小型住宅，唔使盲目追趕日本「四式分離衞浴」，只要「洗手台外移」搭配簡單淋浴屏風，已經可以喺細細單位做到早晨動線分流，化解「搶廁所」爭端。
姣姐講多句：講真，朝朝五時起身要趕著吹頭化妝嗰陣，馬桶位被人坐住滑手機半小時，你睇住嗰支45度斜嘅沐浴露，真係唔會笑到斷氣？問題唔係規矩嚴唔嚴，係屋細唔細到令一家人朝朝好似上工排隊。
黃姣姐整合｜頂硬上
