重慶大學10月26號下午，內地知名電單車品牌「張雪機車」搞咗個專場校招宣講會，創辦人張雪本人嚟到台上親身「賣盤」。佢為「985、211」名牌高校研發崗位開出最高15萬人民幣（約17.7萬港元）年薪，點知現場唔少工科畢業生即刻嫌少，#張雪被嫌棄開低價員工稱入職半月漲薪# 即沖上微博熱搜榜，反映內地傳統電單車製造業同新能源智能車企之間嘅薪酬鴻溝。
薪酬表拆開睇：普通院校研發崗10萬至13萬人民幣（約11.8萬至15.3萬港元），985/211尖子研發崗12萬至15萬人民幣（約14.2萬至17.7萬港元），非研發崗10萬至12萬人民幣（約11.8萬至14.2萬港元），另計加班費，提供六險一金同實習期免費宿舍。呢輪招聘約100人，研發崗位佔7成，現場爆滿到走廊都擠滿人。
面對嫌少，張雪現場開出佢自己嘅「實操門檻」：「只要會騎電單車、能拆裝整車、掌握3D工程繪圖軟件，符合條件投遞履歷便肯定能入職。」佢坦承公司屬初創、現階段開唔到頂級起薪，但承諾首年績效前10%可加50%、普遍員工一年後有兩成漲幅，起薪最多可上調30%至40%。
但名校工科學生對呢開價反應冷淡，原因好簡單：同屆碩士入賽力斯、比亞迪或長安等新能源汽車整車廠，研發起薪已經20萬至35萬人民幣（約23.6萬至41.3萬港元），智能駕駛算法類崗位更可突破40萬人民幣（約47.2萬港元）。傳統電單車製造業同新能源智能車企嘅起薪，相差逾倍。
除咗薪資，張雪嘅招聘標準都惹來專業層面嘅質疑。要求頂尖研發人才要「會騎車、能拆車」，被指其實係喺物色「高級維修技工」，唔係真正做底層架構、力學模擬同動力學研究嘅研發專家；受過系統工程教育嘅人才，核心資產係可跨領域遷移嘅數理同工程基本功，唔應該被窄化到單一硬件嘅拆裝熟練度。
姣姐講多句：傳統摩托車製造同新能源智能車企嘅薪酬斷層，其實就係一個「產業定位」問題——一個做硬件、一個做算法加硬件加數據。張雪講「入職半月漲薪」呢個 slogan 好搞笑，但現實係，你畀學生「學到嘢」，佢哋會問「幾多嘢」，而唔係「幾耐」。
黃姣姐整合｜頂硬上
