成人題材｜18+
最近外媒做咗一單調查，掘到一個規模好大、扮「日常工具」嘅AI App網絡：表面賣寵物照片生成器、語言學習、健身教練，下載落嚟入面竟然暗藏「深偽」（Deepfake）色情功能，專門生成未經當事人同意嘅露骨影像。
手法最陰係，呢班人唔係直接賣色情，而係先做正經app上架，等用户下載埋先，喺背景偷偷回傳用户嘅來源地、語言同識別資料，按伺服器回應決定繼續扮正經，定係切換到另一套隱藏介面，讓用户上傳真實人物照片「換臉」。
規模方面，研究指出呢啲App由2025年底浮現，2026年春開始爆炸式增長，最高峰每星期新增約30個。截至今年9月，光係Google Play就有27款在架，累計下載超過35萬次；其中叫「DiffAI」嘅App自2025年12月推出後，下載量已突破10萬。事件曝光後，Apple已緊急移除19款，Google亦將DiffAI等App撤下。
圖片：RWambua-WMF／CC BY-SA 4.0／Wikimedia Commons
調查更指背後疑似由中國開發者操盤，同喺香港註冊嘅「KeLing Technology Limited」有關聯；伺服器端發現大量中文註解程式碼、中文託管環境，影片仲帶中文剪輯軟體水印。Meta指已封鎖相關廣告同數百個相關App資產。
姣姐講多句： 呢種「正經皮、色情骨」嘅做法，最狠嘅就係利用平台審查嘅空窗同用户對日常app嘅信任，等用户自願下載埋先發難。成件事除咗科技角度，仲係一個真人受害者可以隨時被「換臉」成色片嘅私隱與人身安全問題——受害嘅未必係名人，任何人都有可能被隨手「生成」。用家自己都要留意下載前睇清開發者名同評價，別因為icon可愛就盲撳下載。
黃姣姐整合｜頂硬上
