無綫台慶劇《璀璨之城》熱播中，爭議卻一個接一個。最新一單，係張曦雯（Kelly）自爆在開拍當日，被要求臨場加拍一場「剝剩底褲」嘅激辯戲，事件曝光後迅速引發全城關注。
張曦雯透露，原劇本只寫到佢可穿內衣出鏡；但開拍當日，監製陳維冠聯同對手張智霖及吳卓羲，臨場提出新構思，要求佢脱到只剩內褲、大露背，同張智霖拍一場大約 7 分鐘、一鏡到底嘅激烈爭執。佢自感被冒犯，當場拒絕，場面一度陷入僵局。
後來劇組因改劇本停工近 3 個月。在復拍探班飯局中，資深前輩江美儀與張智霖太太袁詠儀介入調解，力勸「拍啦，阿女，你應該要拍」，認為大犧牲可讓角色立體化；張曦雯最終在袁詠儀承諾全程「監場」之下妥協完成拍攝。事後佢受訪時為大局圓場，稱讚對手專業並滿意成片，但難平網民怒火。
火藥味最重嘅，係張智霖早前喺劇集宣傳時嘅一段採訪。佢主動提起張曦雯有挑戰電視尺度嘅場面，更以輕佻口吻笑稱張曦雯起初拒絕，但目睹同劇陳曉華與陳瀅均有大膽演出後「激起鬥心」：「去到後期少少，當佢見到陳瀅同曉華……『嘩！你哋咁樣？Wait a minute！我可以！』」大批網民怒轟此説法係顛倒黑白，將女藝人身體界線嘅抗爭矮化為女藝人之間「爭風吃醋」、「愛比較」嘅鬧劇。
同一場風波亦令矛頭直指監製陳維冠。此前陳瀅在劇中全裸被男主角「撥開雙腿」、以手機近距離特寫拍照嘅一幕，早被批意淫低俗；而張智霖早前已透露該場戲同樣係監製臨場指使加插。網民狠批劇組為催谷收視不惜罔顧演員意願：「呢套戲嘅監製係咪自肥？差唔多個個女演員都要剝，有冇必要去到咁盡？」亦有人怒斥無綫黃金時段閤家歡劇集淪為「成人台」。
連袁詠儀同江美儀都受波及。網民批評二人身為資深女性前輩，非但沒有支持後輩捍衞身體界線，反而幫劇組勸降施壓，有留言直言「女人勸女人脱，完全理解唔到」。
姣姐講多句：呢單事真正惹火嘅，唔係「尺度」問題，而係「點樣被推落度」嘅過程——臨場加碼、同劇比較、前輩勸降——層層壓低一個後輩女藝人嘅界線；而「唔輸得」三個字，正正把呢個權力結構輕輕帶過，變成一句笑話。
黃姣姐整合｜頂硬上
