日本殿堂級歌手高橋洋子，就係憑《新世紀福音戰士》（EVANGELION，簡稱EVA）經典主題曲《殘酷天使的行動綱領》紅遍全球嗰位。佢近日宣佈，呢年底會展開名為「夜想曲」嘅亞洲巡迴演唱會，行遍台北、新加坡同香港，而香港站定喺2027年1月16日（星期六），假黃埔TIDES舉行。
呢場《YOKO TAKAHASHI EVANGELION Live Tour -Nocturne- in Hong Kong》，係高橋洋子首次以個人身份喺香港開個唱。佢今年60歲，以前每次嚟港都已經有大批動漫迷朝聖，今次個人演出，場地喺九龍紅磡德安街1號黃埔天地嘅香港TIDES，全場企位，17時入場、18時開演。門票定於10月28日中午12時公開發售，分四種票價：SSVIP $1,399、VIP $999、MEZZF $899、1F $699。
買最貴嘅SSVIP，除咗入場，仲有高橋洋子親筆簽名明信片、紀念T恤同巡演海報，更可以喺1V10集體合照入面同呢位EVA經典歌姬同框。VIP門票亦送印刷簽名明信片、歡送會同巡演海報，讓不同預算嘅樂迷都有得參與。高橋洋子仲特意拍咗宣傳短片，話會同香港樂迷展開一場「跨越世代、交織回憶與感動嘅音樂之夜」。
姣姐講多句：對好多人嚟講，《殘酷天使的行動綱領》早唔單止係一首動畫主題曲，而係一部集體青春記憶。幾代EVA迷喺呢首歌入面，都揾到自己當年追番、熱血同成長嘅影子。高橋洋子60歲首次以個人個唱形式登陸香港，係一次遲到但值得嘅「朝聖」，仲係自己青春嘅你，到時企喺TIDES，同佢齊聲唱出嗰句「殘酷嘅天使喎」，大概係今年最治癒嘅場面之一。
黃姣姐整合｜頂硬上
