TVB四大童星長大了！童星黃可盈（Melanie）近日喺IG分享一張12年前同陳子樂、梁暐昕、盧頌衡嘅合照，寫道：「你可能不知道我們是誰，但應該曾在電視上見過我們。」四小隻由細人仔變大人，引起不少舊日觀眾懷舊。
黃可盈自5歲入行，曾喺《愛．回家》飾「Candy」、《點解阿Sir係阿Sir》，近年喺《星空下的仁醫》演未成年懷孕少女「徐佳雪」，仲考到英國皇家音樂學院八級鋼琴，多材多藝。
「小姚金鈴」梁暐昕就係最標緻。佢憑《宮心計》演楊茜堯「姚金鈴」童年版而紅，其後喺《公主嫁到》演陳法拉「司徒銀屏」童年版。23歲嘅梁暐昕自2017年拍畢《老表，畢業喇！》後轉低調生活，由近照睇，五官精緻，散發文青女神氣質。
陳子樂同樣5歲入行，演過逾四十部作品，最深入民心係《On Call 36小時》嘅「龍仔」，以及《致命復活》中郭晉安嘅自閉症兒子，演技獲極高評價；近年專心學業，係喇沙書院畢業生。
至于24歲嘅盧頌衡，曾喺《警犬巴打》演黃宗澤童年版，2011年喺港台實況劇《賭海迷徒》演樊亦敏嘅兒子，兩人保持聯絡如母子。佢已大學畢業，現為劍擊教練。
姣姐講多句，由細靚到大嘅梁暐昕同女大十八變嘅黃可盈，真係令人眼濕濕。四大童星各有發展，仲保持聯絡，乜時隔12年先曬舊照，真係好有懷舊味。
黃姣姐整合｜頂硬上
