杭州1名懷孕7個月嘅劉女士，只係致電圓通速遞客服取消快遞訂單、順口問句「點解以前寄得而家寄唔到」，竟然被系統自動判定為「投訴」，生成2張罰單，罰咗快遞員400元人民幣。

事件發生喺10月9日。劉女士透過菜鳥裹裹下單寄送紙本發票，快遞員羅先生上門話發票寄唔到，但已經喺系統按咗「已收取」，App入面又無得取消，劉女士只好致電客服。客服話唔到，只建議揀其他物流公司，掛線。

點知5分鐘後，羅先生就急緊爆到屋企，攞住電話帶住哭腔問：「你點解要投訴我態度有問題？我一天先賺200蚊，你而家叫我全俾罰款冇晒！」

問題係，菜鳥裹裹事後核查都證實，劉女士真係只做咗「取消訂單同諮詢」，完全冇投訴。但羅先生手機入面實實在在收到2張「服務態度」200元罰單。佢哋自己系統自己生。

身懷六甲、獨處喺屋企嘅劉女士，被門外鬧噉嚇到高聲呼救報警，直到屋苑保安趕到調解，羅先生先肯離開。她本身有宮頸閉鎖不全，屬高風險孕婦，當晚就腹絞痛送急症，診斷為先兆流產，醫生嚴命卧床靜養。

劉女士受訪話：「快遞員辛苦我理解，我亦好冤枉。大公司有自己的考核標準，想扣員工錢，但不能把所有矛盾轉嫁到我哋身上。」

更荒謬嘅，係圓通杭州仁和分公司主管直認：「只要客户打電話進線詢問，系統就會自動生成工單，對快遞員罰每條100至200元，完全冇得喺線上撤銷。」省區答覆就係一句「進線就算投訴」。

圓通總部即否認，話係加盟網點傳導錯誤信息，並發通報致歉。

最終仁和分公司同劉女士達成和解，賠償1,000元人民幣（約1,174港元），由分公司同主管各掏500。而劉女士嘅首要條件，係將涉事快遞員調離該屋苑派送區——呢項安排已落實。

「姣姐講多句」：系統判你投訴就投訴，人連申訴都冇得，呢啲真係「人不如系統」。大公司想扣人錢無可厚非，但扣完仲要將怒火轉嫁畀基層同消費者，就係另一回事啦。

黃姣姐整合｜頂硬上