西澳女帶自制咖喱返公司同同事分享，午飯食剩低嗰盒即舌頭中麻。經數月調查，警方鎖定佢43歲嘅親密女友（同事）涉嫌摻入滅蝸牛藥，案件11月開庭。
午飯咖喱食第一口就麻
今年2月12日，西澳州奧爾德伯里（Oldbury）一間公司，58歲事主照例帶自己燜嘅咖喱返去食。佢朝早休息時已分咗少少俾同事，大家都食咗無事；輪到佢自己開餐盒剩低嗰份時，只係試咗一口，就突然覺得味道怪怪，舌頭即刻傳嚟強烈麻痺感。佢認真睇入盒，驚見咖喱醬汁佈滿鮮綠色不明顆粒，即刻吐晒報警。
化驗證實係滅蝸牛藥
警方收到案立即調查，將殘留咖喱同嗰啲綠色顆粒送去檢驗，證實係含劇毒成分 metaldehyde 嘅「滅蝸牛藥」，大劑量誤食有機會致命。
鎖定親密女友
經過數月搜證調查，西澳警方鎖定一名43歲女子涉嫌落毒。調查顯示，事主嗰朝早休息時段過後，被告進入過公司內一間化學品儲存間，其後再前往存放咖喱嘅員工食堂。警方同時證實，被告與事主係親密伴侶關係，且喺同一間公司任職。10月8日，警方喺 Golden Bay 一單位將被告拘捕，控告一項意圖傷害他人、危及他人生命健康或安全嘅非法作為或不作為罪。案件預計喺2026年11月5日正式開庭。事主有否住院及後續健康狀況，官方並無交代。
姣姐講多句
最親密嘅人，同最危險嘅人，原來竟然係同一人。呢種反差，真係比任何懸疑劇都要震撼。但事件涉及嚴重犯罪，受害人嘅身體情況都未獲官方確認，呢度就只講事實，不敢再鬧。
黃姣姐整合｜頂硬上
