美國郵輪公司Villa Vie Residences喺2026年10月27日宣佈暫停營運，安排長期「居住」喺自家郵輪Villa Vie Odyssey嘅203名乘客喺柬埔寨施亞努市下船。公司解釋，伊朗戰爭推高燃油價格，令營運成本高到難以負擔。
呢班乘客係世上最長住「酒店」嘅旅客：郵輪已喺海上航行至少755日，係少數提供旅客租用或購買長期甚至永久艙房嘅郵輪之一。公司聲明寫住，過去每間艙房每月燃油成本平均約1,800美元，近期喺亞洲部分地區已升至估計6,000至8,000美元。聲明稱：「公司無法將如此大幅增加的成本轉嫁給旅客，因此產生的資金缺口，已讓現行營運模式面臨難以承受的財務壓力。」
施亞努省副省長隆迪蒙（Long Dimanche）表示，呢艘長200公尺嘅郵輪由泰國抵達，載住203名旅客同156名船員；部分旅客已搭機離去，其他人留在施亞努市，郵輪預計31日加油離港。當地官員指，乘客只有7小時收拾行李下船。
美國乘客卡辛漢（Randy Cassingham）同妻子Kit自2024年10月郵輪由貝爾法斯特啟航後就一直住喺船上。佢哋花咗約100萬美元參加包辦式旅程，原本期望可持續至少15年。卡辛漢指控郵輪公司「完全沒有採取任何行動」協助滯留旅客，乘客被載到市中心後連一份酒店名單都冇拿到。公司則喺聲明中表示，正「與乘客合作協調離船事宜，並尋找臨時住宿安排」。
硬蕉抽兩句： 呢班乘客花咗100萬美元買一個冇地址、冇水費、冇地契嘅「永久住所」，原來租金最貴嘅唔係物業，而係戰爭。15年嘅人生計劃，被一桶油價催咗。
