【成人題材｜18+】美國俄亥俄州一宗司法醜聞，主角係一名75歲嘅前法官，佢扮律師入監獄探監，仲用電子煙同煙草「換」男囚嘅性服務，日前被捕被控。

據FOX19報道，克萊蒙特縣（Clermont County）警長辦公室追查一宗囚犯藏有嚼煙、電子煙等違禁品嘅案件，線索指向曾任漢密爾頓縣（Hamilton County）法官、現為律師嘅肯尼（James Patrick Kenney）。警於8月15日立案調查，確認8月4日肯尼曾以律師身份進行「接觸式探訪」，但該囚犯並非佢嘅當事人，只係私人相識。經搜查住所後，肯尼在會面中承認利用「專業身份」帶物品入獄交對方，以換取性服務；佢喺8月24日被捕。

肯尼目前被控3項輕罪（Misdemeanor），包括一級輕罪「從事賣淫」、二級輕罪「妨礙公職人員執行職務」及三級輕罪「招攬性服務」，據報出庭時須坐輪椅。佢最初被禁保釋，其後保釋金定為15萬美元（約117萬港元）。

副警長懷特（Mike White）表示：「我們信任律師，他們出示證件，我們亦有保障設施安全的程序。」佢補充，雖然控罪只係輕罪，警方仍非常重視，「當有人聲稱是當事人律師，實際卻不是，我們會非常嚴肅處理」。

翻舊帳，肯尼2005年已曾因非禮罪（sexual imposition）被俄亥俄州最高法院暫停律師執業資格2年（其中18個月緩期執行），並判2年感化令，勒令接受心理治療及強制戒酒。警方現繼續調查，不排除對案中其他人士提出起訴。

姣姐講多句：一個判咗人幾十年嘅人，用埋自己嘅專業身份去「換」電子煙，仲要坐輪椅出庭——權力用錯方向，真係頂硬上。呢單嘢最諷刺嘅地方唔係佢幾大齡，而係佢竟然以為律師證就係VIP通行證，可以開到任何「房間」，最後開到嘅只係法庭。🚔

黃姣姐整合｜頂硬上