台星巴克「去冰不補」惹彈，有網民10月中旬寫信問美國總部，客服回信話美國直營門市去冰要補滿、唔加錢，但話明同台灣門市無關，留乜都係統一自己決定。
最近台灣星巴克冰飲「去冰不補」嘅政策鬧到人人有話講，不少市民反映，大杯、特大杯飲品一揀去冰，容量就變少，甚至出現只剩返半杯嘅情況。有一網民覺得唔啱，10月中旬寫信去美國星巴克總公司反映，仲將收到嘅客服回信公開晒，網民睇到即刻傻眼。
原PO喺Threads發文話，佢係一個長期忠實嘅星巴克顧客，現居台灣，向來將星巴克視為日常生活嘅一員，更係真心支持嘅品牌。但佢認為，近期台灣特許經營商推行嘅營運調整，已經背離咗星巴克品牌嘅核心價值，所以要寫信問明。
美國總部客服喺回信中話，美國公司直營門市冇「去冰不補」政策，亦冇任何額外加收費用嘅規定；消費者買冰飲要求少冰或去冰，標準做法係用額外飲料補足杯子容量，而且唔另外收費。客服最後話會將意見轉交相關團隊，作為改善服務嘅參考。
圖片：Coolcaesar／CC BY-SA 4.0／Wikimedia Commons
不過呢封回信最「狠」嘅位，係佢話明上述標準只適用於美國公司直營門市（U.S. company-operated stores），兩地嘅經營權責要分開睇，美國回信並唔代表台灣門市必須跟隨。
原因都好簡單：2017年統一集團買回美方剩餘股權後，台灣星巴克就已成統一100%持股，由門市管理、定價、營銷、人事到日常營運都係統一主導，美國總部並非台灣門市政策嘅直接決策者，亦無權干涉其他區域授權商嘅營運。所以美國客服講得再清楚，都唔代表台灣門市要跟隨。
姣姐講多句：消費者跨海寫信問到總部，總部答得再正，都改變唔到杯入面嘅嘢。真正決定你杯入面有幾多冰、幾多咖啡嘅，從來都係本地持股嗰邊，唔係波特蘭嗰邊。下次杯少咗，別寄望美國救你，直接去門市同佢哋傾先。
黃姣姐整合｜頂硬上
